អតីតសមាជិកព្រឹទ្ធសភាហៃទី លោក Joseph Joel John បានផ្តល់ចម្លើយពីភាពមានទោសពៃរ៍ កាលពីថ្ងៃអង្គារ (ទី១០ ខែតុលា) ចំពោះបទចោទប្រកាន់ចំនួន ៣ករណី នៅក្នុងសំណុំរឿងរបស់តុលាការសហរដ្ឋអាមេរិក សម្រាប់ការមានចំណែករបស់លោក ក្នុងការធ្វើឃាតឆ្នាំ២០២១ លើប្រធានាធិបតីជាប់ឆ្នោតចុងក្រោយរបស់ប្រទេសតំបន់ការ៉ាអ៊ីព លោក Jovenel Moise។

លោក John ដែលជាជនជាប់ចោទទី៣ ក្នុងចំណោមជនជាប់ចោទ ១១នាក់ ដែលផ្តល់ចម្លើយពីការមានទោសកំហុស នឹងត្រូវកាត់ទោសនៅថ្ងៃទី១៩ ខែធ្នូ។ ក្នុងសេចក្ដីថ្លែងការណ៍ពីការផ្ដល់ចម្លើយសារភាព លោក John បានព្រមទទួលពីភាពមានទោសពៃរ៍ ក្នុងការផ្តល់ជំនួយជាសម្ភារៈដល់គម្រោងផែនការសម្លាប់លោក Moise ក្នុងនោះរួមទាំងរថយន្តជួល ដែលប្រើប្រាស់ជាមធ្យោបាយដោយអ្នកសមគំនិត ការណែនាំឲ្យទៅទាក់ទងក្រុមអន្ធពាល ដែលពួកគេបានស្វះស្វែងរកការគាំទ្រ និងការប៉ុនប៉ងទិញអាវុធ។

យោងតាមសេចក្តីថ្លែងការណ៍នោះ បានឲ្យដឹងថា លោក John មានវត្តមាននៅក្នុងការជួបប្រជុំ ជាកន្លែងដែលមានការពិភាក្សាពាក់ព័ន្ធនឹងការធ្វើឃាតលើលោក Moise ក្នុងនោះរួមទាំងមួយយប់ នៅមុនពេលការធ្វើឃាត ត្រូវបានអនុវត្ត៕