ក្រុមសេវាកម្មសង្រ្គោះបន្ទាន់ បាននិយាយនៅព្រឹកថ្ងៃពុធនេះថា មនុស្សយ៉ាងហោច ៤នាក់ បានស្លាប់ ក្នុងហេតុការណ៍អគ្គិភ័យអគារស្នាក់នៅរបស់អ្នកស្រុក ស្ថិតនៅទីក្រុងភាគពាយ័ព្យ Vigo ប្រទេសអេស្ប៉ាញ កាលពីព្រឹកទាបភ្លឺ ។

លោក Patricia Rodriguez គឺជាទីប្រឹក្សាសន្តិសុខក្នុងស្រុក និយាយថា មនុស្ស ១០នាក់ផ្សេងទៀត ត្រូវបានដឹកទៅកាន់មន្ទីរពេទ្យ ដើម្បីព្យាបាលរបួសបង្កឡើងដោយសារការស្រូបផ្សែង និងរបួសផ្សេងៗទៀត ។

លោក Rodriguez បន្តថា ពួកយើងមានការសោកស្តាយខ្លាំងណាស់ ពេលដែលមានករណីមនុស្សស្លាប់បែបនេះ ។ លោកថា មានមនុស្សប្រហែល ៣០នាក់នៅក្នុងអគារនេះ ។

អ្នកស្រុក ពុំបានផ្តល់អត្តសញ្ញាណម្នាក់ និយាយថា ស្រ្តីជាម្តាយ និងកូន ៣នាក់របស់គាត់ កំពុងបាត់ខ្លួន។

ដោយឡែក មូលហេតុដែលបណ្តាលឲ្យអគ្គិភ័យនេះ កើតឡើង មិនត្រូវបានគេដឹងនោះទេ ខណៈដែលការស៊ើបអង្កេតកំពុងធ្វើឡើង។

អគ្គិភ័យនេះ បានចាប់ផ្តើមឆាបឆេះឡើងកាលពីវេលាម៉ោង ៤ព្រឹកទាបភ្លឺថ្ងៃពុធនេះ ហើយក្រុមភ្នាក់ងារពន្លត់អគ្គិភ័យ បានធ្វើការជាច្រើនម៉ោង ទើបអាចពន្លត់ភ្លើងបាន៕