អតីតខ្សែបម្រើ Chelsea និង Real Madrid, Eden Hazard បាន​សម្រេច​ចិត្ត​ចូល​និវត្តន៍​ពី​អាជីព​បាល់​ទាត់​ហើយ ក្រោយចំណាយពេល ១៦ឆ្នាំ។

កីឡាវ័យ ៣២ ឆ្នាំរូបនេះ បានផ្លាស់ទៅកាន់ Real Madrid ពីតោខៀវ Chelsea កាលពីឆ្នាំ ២០១៩ ក្នុងតម្លៃ ៨៩ លានផោន តែបង្ហាញខ្លួនបានត្រឹម ៥៤ ប្រកួតប៉ុណ្ណោះនៅក្នុងលីគ និង​បាន​ចាក​ចេញ​ពី Real Madrid នៅដំណាច់រដូវកាលមុន។

កីឡាករប៊ែលហ្ស៊ិករូបនេះ ក៏បានចូលនិវត្តន៍ផងដែរពីក្រុមជម្រើសជាតិកាលពីខែធ្នូឆ្នាំមុន បន្ទាប់​ពី​បញ្ចប់​បេសកកម្ម​របស់ខ្លួននៅ World Cup 2022 លើទឹកដីកាតា​ជាមួយ​ប៊ែល​ហ្ស៊ិក​ដែល​ធ្លាក់​ត្រឹម​វគ្គ​ចែក​ពូល។

នៅជាមួយ Real Madrid, Eden Hazard ធ្លាប់ឈ្នះជើងឯក UEFA Champions League, FIFA Club World Cup, European Super Cup, La Liga ២ ដង Copa del Rey និង អេស្ប៉ាញ Super Cup ២ ដង។

ថ្វីបើឈ្នះជើងឯកច្រើនក៏ពិតមែន ពេលវេលាជាមួយ Real Madrid មិនចាត់​ទុក​ជា​ឱកាស​ជោគ​ជ័យ​ នៃ​អាជីពរបស់ខ្លួនឡើយ ដោយសាររបួសញាំញី ធ្វើឱ្យ Hazard បង្ហាញខ្លួនបានត្រឹម ៧៦ ប្រកួត​ប៉ុណ្ណោះរកបាន ៧ គ្រាប់។

រំលឹកថា Eden Hazard បានចាប់ផ្តើមអាជីពរបស់ខ្លួនដំបូងជាមួយក្លិបបារាំង Lille បង្ហាញ​ខ្លួន​បាន​ ១៤៩ ប្រកួតរកបាន ៥០ គ្រាប់ឈ្នះជើងឯក Ligue1 និង French Cup ក្នុង​រដូវកាល​តែ​មួយ​ ២០១០-១១។

អាជីពជោគជ័យនៅទឹកដីបារាំង Eden Hazard សម្រេចបានការផ្ទេរមកកាន់តោខៀវ Chelsea នៅ​ឆ្នាំ ២០១២ ក្នុងតម្លៃ ៣២ លានផោន និងចាត់​ទុក​ថា​ជា​អាជីព​ជោគ​ជ័យ​នៅ​លើ​ទឹកដី​អង់​គ្លេស​ក្រោយ​បង្ហាញខ្លួនសរុប ៣៥២ ប្រកួតរកបាន ១១០ គ្រាប់ ឈ្នះជើងឯក English Premier League ២ លើក Europa League មួយលើក និងជាកីឡាករឆ្នើមបំផុតប្រចាំរដូវកាល ២០១៤-១៥ នៅអង់គ្លេស៕ អត្ថបទ៖នាង សុភាវុធ