អ្នកសារព័ត៌មានសញ្ជាតិអូស្ត្រាលី លោកស្រី Cheng Lei ដែលត្រូវបានឃុំខ្លួនក្នុងប្រទេសចិន ដោយសារមានទោសក្នុងបទចោទពាក់ព័ន្ធនឹងសន្តិសុខជាតិអស់រយៈពេលជាង ៣ឆ្នាំនោះ បានត្រឡប់ទៅដល់ប្រទេសកំណើតវិញហើយ នៅថ្ងៃពុធ (ទី១១ ខែតុលា) បន្ទាប់ពីត្រូវបានដោះលែង។

លោកស្រី Cheng វ័យ ៤៨ឆ្នាំ គឺជាអ្នកអានព័ត៌មានសេដ្ឋកិច្ចឲ្យស្ថានីយទូរទស្សន៍រដ្ឋចិន នៅពេលដែលនាង ត្រូវបានចាប់ឃុំខ្លួន កាលពីខែសីហា ឆ្នាំ២០២០ ពីបទចោទប្រកាន់ថា បានចែករំលែកព័ត៌មានសម្ងាត់របស់រដ្ឋជាមួយប្រទេសមួយផ្សេងទៀត។

លោកស្រី Cheng ដែលត្រូវបានកាត់ទោសដោយសម្ងាត់ ក្នុងខែមីនា ឆ្នាំ២០២២ បានទៅដល់ទីក្រុង Melbourne ប្រទេសអូស្ត្រាលីហើយ ហើយត្រូវបានទទួលស្វាគមន៍នៅឯព្រលានយន្តហោះដោយរដ្ឋមន្ត្រីការបរទេសអូស្ត្រាលី លោកស្រី Penny Wong និងឯកអគ្គរដ្ឋទូតអូស្ត្រាលីប្រចាំនៅប្រទេសចិន លោក Graham Fletcher។ នាយករដ្ឋមន្ត្រីអូស្ត្រាលី លោក Anthony Albanese បាននិយាយថា លោកស្រី Cheng បានជួបជុំជាមួយកូនទាំង២ និងក្រុមគ្រួសាររបស់គាត់វិញហើយ ដោយលោកបានបន្ថែមថា ការដោះលែងលោកស្រី ធ្វើឡើងបន្ទាប់ពីដំណើរការផ្លូវច្បាប់នៅក្នុងប្រទេសចិន ត្រូវបានបញ្ចប់សព្វគ្រប់។

ចំណែកឯក្រសួងសន្តិសុខរដ្ឋរបស់ប្រទេសចិន បានឲ្យដឹងថា លោកស្រី Cheng បានផ្ដល់ចម្លើយពីភាពមានទោស ចំពោះការចោទប្រកាន់ពីបទបញ្ជូនព័ត៌មានសម្ងាត់របស់រដ្ឋដោយខុសច្បាប់ទៅបរទេសទាក់ទងនឹងការងាររបស់លោកស្រីសម្រាប់ប្រព័ន្ធផ្សព្វផ្សាយរដ្ឋ។ លោកស្រីត្រូវបាននិរទេសខ្លួនចេញ បន្ទាប់ពីបានជាប់ទោសរយៈពេល ២ឆ្នាំ និង១១ខែ៕