ក្រចេះ៖ មន្ទីរបរិស្ថានខេត្តក្រចេះ នៅថ្ងៃទី១១ខែតុលាម្សិលមិញ បានចេញប្រកាសព័ត៌មាន បដិសេធ និងច្រានចោលទាំងស្រុង ចំពោះការចុះផ្សាយរបស់សារព័ត៌មានដើមរាំង ដែល​បាន​ចោទ​ប្រកាន់​មន្ទីរបរិស្ថានថា ឃុបឃិតជាមួយអាជ្ញាធរភូមិ ដើមយកប្រាក់អ្នក​ពីជីក​បូម​មាស​ដោយ​ម៉ាស៊ីន​មួយ​គ្រឿង​ស្មើរនឹង៦០ម៉ឺនរៀល និងមានទីតាំងរុករករ៉ែមាសនេះ ចំនួន១០០ទីតាំង និង​ប្រើប្រាស់​ដោយម៉ាស៊ីនខួងដើម្បីរុករករ៉ែមាស។ ការចុះផ្សាយនេះ គឺគ្មាន​មូល​ដ្ឋាន​ច្បាស់​លាស់​មិន​បាន​ស្វែង​រក​មូល​ហេតុ ឬអង្គហេតុគ្រប់ជ្រុងជ្រោយ ដែលមានចរិកលក្ខណៈបង្កាច់បង្ខូចញុះញុង ធ្វើឱ្យ​​ប៉ះពាល់ដល់កិត្តិយសមន្ត្រីនៃមន្ទីរបរិស្ថានខេត្តក្រចេះ។

ក្នុងន័យនេះ មន្ទីរបរិស្ថានខេត្តក្រចេះបានបញ្ជាក់ថា កាលពីថ្ងៃទី៨-៩ ខែតុលា ឆ្នាំ២០២៣ មន្ទីរ​បរិស្ថាន​ខេត្ត​ក្រចេះ បានធ្វើការចុះទប់ស្កាត់បង្ក្រាបករណីរុករកបូមរ៉ែមាស នៅចំណុចសោមដឺប៉ូ ក្នុង​នោះមន្ត្រីបានចុះដល់ទីតាំង ប្រទះឃើញករណីបូមរុករករ៉ែមានជាលក្ខណៈគ្រួសារចំនួន ០៨​ទីតាំង ជនសង្ស័យត្រូវបានរត់គេចខ្លួនបាត់អស់ និងបន្សល់ទុកនៅរោងស្នាក់នៅចំនួន ០៨រោង ទុយោ​បូម​ទឹកចំនួន ០១ដុំប្រវែង៨០ម៉ែត្រ និងក្បាលបូមទឹកចំនួន ០១គ្រឿង និងមិន​បាន​ប្រ​ទះ​ឃើញ​អ្វី​ទៀត​ឡើយ មន្ត្រីកំពុងបន្តស្រាវជ្រាវបន្ថែមទៀត ចំពោះការចុះផ្សាយថា មន្ត្រីប្រមូលប្រាក់ ប្រើ​ប្រាស់​ម៉ាស៊ីនខួងរុករករ៉ែមាស និងមានទីតាំងរុករករ៉ែមាសចំនួន ១០០កន្លែង គឺមិនមែ​ន​ជា​ការ​ពិត​នោះ​ទេ។

មន្ទីរបរិស្ថានខេត្តក្រចេះ សូមធ្វើការបដិសេដ និងច្រាន​ចោល​ទាំង​ស្រុង​ចំពោះ​ការ​ចុះផ្សាយ​របស់​សារព័ត៌មាន ដើមរាំងខាងលើ ដែលមានលក្ខណៈញុះញុង ជំរុញ​ឱ្យ​មាន​ភាព​យល់​ច្រឡំ​ និង​ធ្វើ​ឱ្យ​ប៉ះ​ពាល់​ដល់កិត្តិយសមន្ត្រីនៃមន្ទីរបរិស្ថានខេត្តក្រចេះទាំងស្រុង។ មន្ទីរបរិស្ថានខេត្តក្រចេះ សូម​ឱ្យ​សារព័ត៌មាន ដើមរាំង កែសម្រួលនូវខ្លឹមសារចុះផ្សាយសារជាថ្មី ដើម្បីជូន​សារធារណៈ​ជន​ទាំង​អស់​ទទួល​ជ្រាប និងឈប់យល់ច្រឡំ និងសូមសារព័ត៌មានទាំងអស់ជួយស្រាវជ្រាវ រកអត្ត​សញ្ញាណ​ជន​ប្រព្រឹត្តល្មើល មកជំនាញមានសមត្ថកិច្ច ដើម្បីអនុវត្តច្បាប់។