លោកនាយករដ្ឋមន្ត្រីអ៊ីស្រាអែល បេន ចាមីន ណេតានយ៉ាហ៊ូ (Benjamin Netanyahu) និង​ក្រុម​មេដឹកនាំបក្សប្រឆាំងបានបង្កើតរដ្ឋាភិបាលរួបរួមបន្ទាន់មួយ និងគណៈរដ្ឋមន្ត្រីសង្គ្រាម ដើម្បី​ឆ្លើយ​តប​ទៅនឹងការវាយប្រហារពីសំណាក់ក្រុមសកម្មប្រយុទ្ធហាម៉ាស។ ក្រុមមេដឹកនាំទាំងនេះ បាន​ធ្វើ​សេចក្តីប្រកាសកាលពីថ្ងៃពុធនៅទីក្រុង តេល អាវីវ (Tel Aviv)។

មនុស្សយ៉ាង​ហោចណាស់ ២.៣០០ នាក់ត្រូវបាន​សម្លាប់​ចាប់​តាំង​ពី​ក្រុម​ហាម៉ាស​បាន​បើក​ការ​វាយ​ប្រហារ​ដ៏គួរឱ្យភ្ញាក់ផ្អើលមួយលើអ៊ីស្រាអែលកាលពីថ្ងៃទី៧ ខែតុលាចុងសប្តាហ៍មុន។      

កង​កម្លាំងការពារជាតិអ៊ីស្រាអែល កំពុងវាយប្រហារសងសឹក។ ពួក​គេ​បាន​ដាក់​គោល​ដៅ​លើ​សាកលវិទ្យាល័យ​មួយ ដែលពួកគេនិយាយថាក្រុមហាម៉ាស បានប្រើជាមូលដ្ឋាន។ 

ប៉ាឡេស្ទីន​កំពុងចោទប្រកាន់ពួកគេពីការដាក់ពង្រាយគ្រាប់បែកផូស្វ័រពណ៌ស ដែលបណ្តាល​ឲ្យ​មាន​ការ​រលាកធ្ងន់ធ្ងរ។ ការប្រើប្រាស់អាវុធនៅក្នុងតំបន់ជនស៊ីវិលត្រូវបានរឹតត្បិតយ៉ាងខ្លាំង។

ក្រុម​មន្ត្រី​អង្គការគ្រូពេទ្យគ្មានព្រំដែនបាននិយាយថា ការវាយ​ប្រហារ​តាម​អាកាស​របស់​អ៊ីស្រាអែល​បាន​ចំមន្ទីរពេទ្យមួយកន្លែងដែលពួកគេគាំទ្រ។ ពួកគេនិយាយថា ពួកគេក៏​បារម្ភ​អំពី​ការ​ខ្វះ​ខា​ត​ប្រេង​ឥន្ធនៈ និងតម្រូវការផ្សេងទៀតផងដែរ។ កាលពីថ្ងៃចន្ទ ក្រុមមេដឹកនាំ​អ៊ីស្រាអែល​បាន​បញ្ជា​ឱ្យ ឡោមព័ទ្ធតំបន់ហ្គាហ្សាទាំងស្រុង ដើម្បីកាត់ផ្តាច់ផ្លូវនាំចូលស្បៀងអាហារ ប្រេងឥន្ធនៈ និង​អគ្គិសនី​។ អគ្គលេខាធិការអង្គការសហប្រជាជាតិ លោក Antonio Guterres បាននិយាយ​កាល​ពី​ថ្ងៃពុ​ធ​ថា បុគ្គលិកមនុស្សធម៌ ចាំបាច់ត្រូវតែចូលទៅដល់តំបន់ហ្គាហ្សា ភ្លាមៗ ដោយគ្មាន​ការ​រារាំង​ឡើយ៕