នាយករដ្ឋមន្ត្រីអ៊ីស្រាអែល លោក Benjamin Netanyahu បានបង្កើត​រដ្ឋាភិបាល​គ្រាអាសន្ន​មួយ​កាល​ពី​ថ្ងៃពុធ (១១ តុលា) ដើម្បីដឹកនាំសង្រ្គាមប្រឆាំងនឹងក្រុមហាម៉ាស ហើយ​រដ្ឋ​មន្ត្រី​ការពារ​ជាតិ​របស់​លោកបានប្តេជ្ញាថា នឹងកម្ទេចក្រុមសកម្មប្រយុទ្ធប៉ាឡេស្ទីនមួយនេះ «ឲ្យ​បាត់​ចេញ​ពីផែន​ដី» ជុំវិញការវាយប្រហារដ៏សាហាវកាលពីចុងសប្តាហ៍របស់ខ្លួន។

ខ្មាន់កាំភ្លើងក្រុមអ៊ីស្លាម ហាម៉ាស បានចូលលុកលុយអ៊ីស្រាអែលពីតំបន់ហ្គាហ្សា ស្ទ្រីប កាល​ពី​ថ្ងៃ​សៅរ៍ នៅក្នុងការវាយប្រហាដ៏គួរឱ្យភ្ញាក់ផ្អើលមួយ ដែលបានសម្លាប់មនុស្សយ៉ាងហោចណាស់ ១.២០០​នាក់ ដែលជាការវាយប្រហាររបស់ក្រុមសកម្មប្រយុទ្ធប៉ាឡេស្ទីន ដ៏​សាហាវ​បំផុត​ក្នុង​ប្រវត្តិសាស្ត្រ​អ៊ីស្រាអែល។

អ៊ីស្រាអែលបានឆ្លើយតបទៅវិញដោយការទម្លាក់គ្រាប់បែកដ៏ច្រើនសន្ធឹកសន្ធាប់ទៅលើតំបន់ហ្គាហ្សា ដែលបានសម្លាប់មនុស្សប្រហែល ១.០៥៥នាក់ ហើយបាន​ដាក់​ពង្រាយ​ទាហាន​រាប់​ពាន់​នាក់​ជុំវិញ​តំបន់ហ៊ុមព័ទ្ធមួយនេះ ស្របពេលមានការរំពឹងទុកថា អ៊ីស្រាអែល​នឹង​បើក​ការ​វាយ​លុក​តាម​ដីគោក ដើម្បីកម្ទេចក្រុមហាម៉ាស។

រដ្ឋមន្ត្រីការពារជាតិអ៊ីស្រាអែល លោក Yoav Gallant បាននិយាយថា «យើងនឹងកម្ទេចក្រុម ហាម៉ាស ឬហៅថា ក្រុមរដ្ឋអ៊ីស្លាមហ្គាហ្សា ឲ្យបាត់ចេញពីផែនដី មិន​ឲ្យ​មាន​វត្ត​មាន​នៅលើ​លោក​នេះ​ទៀត​នោះទេ។

មេដឹកនាំបក្សប្រឆាំងកណ្ដាលនិយម លោក Benny Gantz ដែលជាអតីតប្រធាន និងជា​ឧត្តម​សេនីយ​ការពារជាតិអ៊ីស្រាអែល បាននិយាយថា នេះជាពេលវេលានៃសង្រ្គាម ហើយត្រូវរួមគ្នា។ លោក Netanyahu និងលោក Gantz បាននិយាយនៅក្នុងសេចក្តីថ្លែងការណ៍រួមរបស់ពួកគេថា ក្នុ​ងអំឡុងពេលនៃការប្រយុទ្ធជាមួយក្រុមហាម៉ាស នៅតំបន់ហ្គាហ្សា រដ្ឋាភិបាល​គ្រា​អាសន្ន​នឹង​មិន​ទទួល​យក​គោលនយោបាយ ឬច្បាប់ដែលមិនពាក់ព័ន្ធណាមួយឡើយ៕