ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បាន​ទទួល​ជួប​សម្តែង​ការគួរសម និងពិភាក្សាការងារជាមួយ ឯកឧត្តម Maura Vieira រដ្ឋមន្ត្រីក្រសួង​ការ​បរទេស​ប្រេស៊ីល ដោយផ្តោតលើការងារមួយចំនួនពាក់ព័ន្ធសក្តានុពលរបស់កម្ពុជា។

នៅ​ក្នុង​ជំនួបការងារ កាលពីរសៀលថ្ងៃទី១១ ខែតុលា ឆ្នាំ២០២៣នេះ ឯកឧត្តម ឌិត ទីណា បាន​គូស​បញ្ជាក់អំពីសក្តានុពលនៃវិស័យកសិកម្មកម្ពុជា ដូចជា ស្រូវ ដែលមានអតិរេកប្រមាណ ៦​លាន​​តោន​ក្នុងមួយឆ្នាំ សម្រាប់ការកែច្នៃនាំចេញ ព្រមទាំងដំណាំសក្តានុពលផ្សេងទៀត ជាអាទិ៍​៖ ស្វាយចន្ទី ដំឡូងមី និងកៅស៊ូ។ ឯកឧត្តមបានបន្តថា លើសពីនេះទៀត កម្ពុជា ជា​សមាជិក​អាស៊ាន ​ដែលមានទីផ្សារធំទូលាយ ព្រមទាំង​មាន​កិច្ច​ព្រម​ព្រៀង​ពាណិជ្ជក​ម្ម​ជា​មួយ​ទីផ្សារ​ប្រទេស​ចិន ដែលនេះជាឱកាសសម្រាប់ការវិនិយោគលើការកែច្នៃនាំចេញ (Downstream)។ ទន្ទឹម​នឹងនេះដែរ កម្ពុជាក៏មានច្បាប់វិនិយោគដ៏គួរឱ្យទាក់ទាញ សម្រាប់​ការ​វិនិយោគ​ពី​ខាង​ក្រៅ​ប្រទេ​ស​ផងដែរ។

ភាគីទាំង​ពីរ បានសាទរចំពោះការចាប់ផ្តើមនេះ និងបន្តយន្តការកិច្ចសហប្រតិបត្តិការ សិក្សា​ពី​គ្នា​ទៅ​វិញ​ទៅមកពីឱកាសវិនិយោគ ដើម្បីភាពរីកចម្រើនទាំងអស់គ្នា ជាពិសេស​ការ​ធានា​បាន​នូវ​សន្តិសុខ​ស្បៀង និងនិរន្តរភាពបរិស្ថាន។

សូមជម្រាបជូនថា ក្នុងជំនួបនាឱកាសនោះ ភាគីប្រេស៊ីល បានលើកឡើង​ពី​គម្រោង​បើក​ស្ថាន​ឯក​អគ្គ​រដ្ឋ​ទូតប្រេស៊ីលប្រចាំកម្ពុជានៅដើមឆ្នាំ២០២៤ និងចេតនា​បង្កើន​ទំនាក់​ទំនង​លើ​គ្រប់​វិស័យ​រវាង​ប្រទេសទាំងពីរ ជាពិសេសលើការវិនិយោគ និងការធ្វើពាណិជ្ជកម្ម។ បន្ថែមលើនេះ ប្រេស៊ីល ​ក៏​គ្រោងនឹងរៀបចំឱ្យមានទស្សនៈកិច្ចផ្លូវការមួយទៀត ពីសំណាក់​រដ្ឋ​មន្ត្រី​កសិកម្ម​ប្រេស៊ីល​មក​កាន់​កម្ពុជា​ផងដែរ នៅក្នុងឆ្នាំ២០២៤ខាងមុខ៕ អត្ថបទ៖ ដោយ ឈិត បូរ៉ាវី