ភ្នំពេញ៖ ក្រសួងសុខាភិបាល នៅព្រឹកថ្ងៃទី១២ ខែតុលា ឆ្នាំ២០២៣នេះ បានចេញសេចក្ដីប្រកាសព័ត៌មានចំនួនពីរ អំពាវនាវដល់ប្រជាពលរដ្ឋកុំជឿ និងកុំទិញផលិតផលសុខភាព ដែលផ្សព្វផ្សាយពុំសមស្រប និងគ្មានមូលដ្ឋានវិទ្យាសាស្ត្រវេជ្ជសាស្ត គ្មានការអនុញ្ញាតពីក្រសួង និងបានណែនាំឱ្យអ្នកប្រកបវិជ្ជាជីវៈសុខាភិបាលឯកជនត្រូវគោរពឱ្យបានហ្មត់ចត់នូវក្រមសីលធម៌វិជ្ជាជីវៈ ហើយអាជ្ញាធររាជធានី-ខេត្តត្រូវជួយលុបបំបាត់ការផ្តល់សេវាសុខាភិបាលដែលគ្មានការអនុញ្ញាត។
យោងតាមសេចក្តីប្រកាសព័ត៌មានរបស់ក្រសួងសុខាភិបាល ស្តីពីការផ្សព្វផ្សាយផលិតផលសុខភាពពុំសមស្រប និងគ្មានមូលដ្ឋានវិទ្យាសាស្ត្រ វេជ្ជសាស្ត និងសេចក្ដីប្រកាសព័ត៌មាន ស្តីពីការផ្សព្វផ្សាយក្នុងក្របខណ្ឌវិជ្ជាជីវៈសុខាភិបាល ដែលគ្មានមូលដ្ឋានវិទ្យាសាស្ត្រ វេជ្ជសាស្ត្រត្រឹមត្រូវនេះ បានឱ្យដឹងថា ក្រសួងសុខាភិបាលបានកត់សម្គាល់ឃើញមានការផ្សព្វផ្សាយពាណិជ្ជកម្មពុំមានច្បាប់អនុញ្ញាតតាមប្រព័ន្ធអនឡាញ ឬបណ្ដាញព័ត៌មានសង្គមនានា ដោយអ្នកមិនមែនជាអ្នកវិជ្ជាជីវៈសុខាភិបាល។
ក្រសួងបញ្ជាក់ថា អ្នកមិនមែនជាអ្នកវិជ្ជាជីវៈសុខាភិបាលទាំងអស់នោះបានធ្វើការផ្សព្វផ្សាយនូវផលិតផលឱសថសម័យ ឱសថបុរាណ ផលិតផលបំប៉នសុខភាព គ្រឿងសម្អាង និងផលិតផលបង្ការ ឬព្យាបាលជំងឺ ដោយប្រើប្រាស់ខ្លឹមសារមិនសមស្រប បំផ្លើសហួសពីការពិត និងគ្មានមូលដ្ឋានវិទ្យាសាស្ត្រវេជ្ជសាស្ត្រត្រឹមត្រូវ ដូចជាផលិតផលគ្រឿងសម្អាងដែលបានផ្សាយថាធ្វើឱ្យស្បែកស ក្នុងរយៈពេលខ្លី និងឱសថសម័យឱសថបុរាណ ឬផលិតផលបំប៉នសុខភាពមួយចំនួនដែលបានផ្សាយថាអាចព្យាបាលជំងឺបានច្រើនប្រភេទ ដែលផលិតផលទាំងនោះអាចមានបន្ថែមសារធាតុហាមឃាត់ ឬមានសារធាតុដែលប្រើលើសកម្រិត ឬខុសរូបមន្ត បណ្តាលឱ្យមានផលប៉ះពាល់ធ្ងន់ធ្ងរដល់សុខភាពប្រជាពលរដ្ឋ។
ក្រៅពីនេះក្រសួងសុខាភិបាល ក៏បានកត់សម្គាល់ឃើញមានការផ្សព្វផ្សាយក្នុងក្របខណ្ឌវិជ្ជាជីវៈសុខាភិបាលរបស់បុគ្គលមួយចំនួន ដែលពុំមានមូលដ្ឋានវិទ្យាសាស្ត្រ វេជ្ជសាស្ត្រ និងការទទួលស្គាល់ពីក្រសួងសុខាភិបាលឬគណៈវិជ្ជាជីវៈសុខាភិបាលបាន និងកំពុងធ្វើឱ្យមានការប៉ះពាល់ដល់ក្រមសីលធម៌វិជ្ជាជីវៈ សេចក្តីថ្លៃថ្នូរបស់អ្នកប្រកបវិជ្ជាជីវៈ សុខាភិបាល និងប៉ះពាល់ដល់សុខភាពសាធារណៈផងដែរ។
ពិនិត្យឃើញបញ្ហាប្រឈមទាំងនេះ ក្រសួងសុខាភិបាល បានអំពាវនាវដល់សាធារណជន ប្រជាពលរដ្ឋមិនត្រូវជឿលើការឃោសនាមិនសមហេតុផល ដែលគ្មានប្រភពច្បាស់លាស់ ជាពិសេសរាល់ការផ្សព្វផ្សាយគ្រប់រូបភាពដោយគ្មានការអនុញ្ញាតពីក្រសួងសុខាភិបាល។
ដើម្បីឈានទៅលុបបំបាត់នូវសេវាសុខាភិបាលខុសច្បាប់ ក្រសួងសុខាភិបាល ក៏បានអំពាវនាវដល់អ្នកប្រកបវិជ្ជាជីវៈសុខាភិបាលឯកជនទាំងឡាយ ដែលបើកបន្ទប់ពិគ្រោះព្យាបាល គ្លីនិក មន្ទីរ ការគ្រប់គ្រងអ្នកពហុព្យាបាល ត្រូវគោរពឱ្យបានហ្មត់ចត់នូវក្រមសីលធម៌វិជ្ជាជីវៈ និងច្បាប់ស្តីពីបំភ្លៃការពិត។
ក្រសួងបានណែនាំដល់ អាជ្ញាធរមូលដ្ឋានគ្រប់រាជធានី-ខេត្ត ចូលរួមណែនាំទប់ស្កាត់រាល់ការផ្តល់សេវាសុខាភិបាលដែលគ្មាន ការអនុញ្ញាតពីក្រសួងសុខាភិបាល និងការផ្សព្វផ្សាយជាលក្ខណៈពាណិជ្ជកម្មក្នុងក្របខណ្ឌវិជ្ជាជីវៈសុ ខាភិបាលដែលពុំមានមូលដ្ឋានវិទ្យាសាស្ត្រច្បាស់លាស់ បំផ្លើសខុសពីការពឺតធ្វើឱ្យមានការយល់ ច្រឡំដល់បងប្អូនប្រជាពលរដ្ឋ៕ អត្ថបទ៖វ៉ន ដារ៉ា
ខាងក្រោមនេះជាប្រភេទឱសថមួយចំនួនដែលត្រូវបានក្រសួងសុខាភិបាលប្រកាសគ្មានលេខបញ្ជីការពីក្រសួង កន្លងមក៖
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
