ការរញ្ជួយដីដ៏ខ្លាំងក្លាមួយបានវាយប្រហារម្ដងទៀត នៅក្នុងខេត្ត Herat ភាគខាង​លិច​ប្រទេស​អាហ្វហ្គានីស្ថាន កាលពីថ្ងៃពុធ (១១ តុលា) ដោយ​បង្ខំ​ឱ្យ​ក្រុម​អាជ្ញាធរ​ដាក់​ពង្រាយ​ឡើងវិញ​នូវ​ភ្នាក់ងារ​សម្រាល​បន្ទុកគ្រោះមហន្តរាយ និងក្រុមសង្គ្រោះ ដែល​ធ្លាប់​បាន​ដាក់​ម្ដង​រួច​ហើយ​នៅ​តាម​ទីតាំង​កើត​ហេតុ បន្ទាប់ពីការរញ្ជួយដីជាបន្តបន្ទាប់កាលពីថ្ងៃសៅរ៍មក ដែល​បាន​សម្លាប់​មនុស្ស​រាប់​ពាន់នាក់។

មកទល់ពេលនេះ មិនទាន់មានព័ត៌មានលំអិតអំពីអ្នកស្លាប់ និងរបួសនៅឡើយទេ នេះ​បើ​យោង​តាម​អ្នក​នាំពាក្យគ្រប់គ្រងគ្រោះមហន្តរាយ លោក Janan Sayeeq បានប្រាប់សារព័ត៌មាន រ៉យទ័រ ប៉ុន្តែ​ក្រុមមន្ត្រីរបស់ខេត្តនេះបាននិយាយថា លំនោឋានរាប់រយខ្នងត្រូវបានបំផ្លាញ។

ការិយាល័យអភិបាលខេត្ត Herat បាននិយាយថា តំបន់មួយចំនួនបានរង «ការខាតបង់ដ៏ធំធេង» ដោយ​មិនបានផ្តល់ព័ត៌មានលម្អិតនោះឡើយ។ ការបំផ្លិចបំផ្លាញដែលកំពុងកើនឡើងនេះ បាន​នាំ​ឱ្យ​លោក Philippe Kropf ប្រធានផ្នែកទំនាក់ទំនងនៃកម្មវិធីស្បៀងអាហារពិភពលោក (WFP) ហៅ​ការ​រញ្ជួយដីថាជា «គ្រោះមហន្តរាយជាន់លើគ្រោះមហន្តរាយ»។

បញ្ហា​ជំនួយមានកម្រិត ធ្វើឱ្យការងារសង្គ្រោះមានការលំបាក បន្ទាប់ពីគ្រោះរញ្ជួយដីដំបូង និង​រញ្ជួយ​ដី​បន្តបន្ទាប់ ចាប់តាំងពីថ្ងៃសៅរ៍មក ដែល​បាន​វាយ​ប្រហារ​ប្រទេស​អភិរក្ស​និយម​ខាង​សាសនា​មួយ​នេះ។

ខេត្ត Herat ជាខេត្តភាគពាយ័ព្យនៃប្រទេស ដែលទីភ្នាក់ងារស្បៀងអាហារ WFP បាន​ចាប់​ផ្តើម​ចែក​ចាយ​ជំនួយដល់ប្រជាជនកំពុងរំជួលចិត្តពីការបំផ្លិចបំផ្លាញភ្លាមៗនៃទីក្រុងរបស់ពួកគេ និង​សាច់​ញាតិ​ដែល​រងរបួស ឬស្លាប់នៅក្នុងគ្រោះឬញ្ជួយដីដ៏មហន្តរាយមួយនេះ៕