លោក Steve Scalise ដែលជាអ្នកតំណាងរាស្រ្តនៃរដ្ឋ Louisiana បាន​ទទួល​ការ​គាំទ្រ​គ្រប់​គ្រាន់​យ៉ាង​ស្ដួច​ស្ដើងពីគណបក្សសាធារណរដ្ឋ កាលពីថ្ងៃពុធ (១១ តុលា) ដើម្បីក្លាយ​ជា​ជម្រើស​របស់​គណបក្ស​របស់​ខ្លួនក្នុងការដឹកនាំសភា ប៉ុន្តែការបែកបាក់​យ៉ាងស៊ី​ជម្រៅនៅ​ក្នុង​បណ្ដា​ថ្នាក់​ដឹកនាំ​បក្ស​សាធារណរដ្ឋ បានគំរាមកំហែង​ឱ្យ​មាន​ភាព​ស្មុគ​ស្មាញ​ដល់​ការ​បោះឆ្នោត​របស់​លោក​ក្នុង​នា​ម​ជា​ប្រធាន​សភា។

ប៉ុន្មាននាទីបន្ទាប់ពីសមាជិកបក្សសាធារណរដ្ឋមួយចំនួនតូច បានបោះឆ្នោត​នៅ​ក្នុង​កិច្ច​ប្រជុំ​បិទ​ទ្វារ ដើម្បីជ្រើសរើសលោក Scalise ជាបេក្ខជនប្រធានសភារបស់គណបក្សនេះ ជោគ​វាសនា​របស់​លោក Scalise ត្រូវបានស្ថិតទៅក្នុងភាពសង្ស័យមិនច្បាស់លាស់។

សមាជិកសភាមកពីគណបក្សសាធារណរដ្ឋជាច្រើនរូប បានប្រកាសថា ពួកគេនឹងមិនគាំទ្រលោក Scalise​ នៅសភាជាន់ទាបដោយគ្មានសម្បទាននោះទេ ដោយត្អូញត្អែរ​អំពី​ដំណើរ​ការ​ដ៏ប្រញាប់​ប្រញាល់​ក្នុង​ការជ្រើសរើសប្រធានសភាថ្មី និងបញ្ចេញការសង្ស័យថា លោក Scalise មិន​អាច​បង្រួប​បង្រួមសន្និសិទសភាដ៏ប្រេះស្រាំរបស់ពួកគេបានឡើយ។

គណបក្សសាធារណរដ្ឋ បានពន្យារពេលការបោះឆ្នោតសភាពេញអង្គមួយ ដែលត្រូវ​បាន​គ្រោង​ទុក​នៅពេលពាក់កណ្តាលរសៀល ខណៈពេលដែលគណបក្សនេះបានប្រមូលផ្តុំឡើងវិញ ហើយ​បាន​ពន្យារពេលការបោះឆ្នោតកាលពីល្ងាចថ្ងៃពុធដោយពុំមានសេចក្ដីសម្រេច។

ពួកគេ​បានកំណត់ពេលកិច្ចប្រជុំមួយទៀតនៃសភានៅពេលថ្ងៃត្រង់ក្នុងថ្ងៃព្រហស្បតិ៍ (១២ តុលា) នេះ ប៉ុន្តែមិនមានសញ្ញាណាមួយបង្ហាញថា បក្សសាធារណរដ្ឋ គឺ​កាន់​តែ​ខិត​ទៅ​ជិត​កិច្ច​ព្រម​ព្រៀង​មួយ ដែលនឹងអនុញ្ញាតឱ្យពួកគេជ្រើសរើសប្រធានសភាថ្មីនៅពេលនេះនោះទេ៕