ប្រជាពលរដ្ឋរស់នៅរាជធានីភ្នំពេញ នៅថ្ងៃទី១២ខែតុលានេះ បន្ត​ចាក​ចេញ​ពីរាជ​ធានី​ភ្នំពេញ​ទៅ​ស្រុក​កំណើត​តាមផ្លូវជាតិលេខ១ ក្នុងថ្ងៃកាន់បិណ្ឌទី១៣។ការធ្វើដំណើរទៅស្រុកកំណើត ក្នុង​បំណង​ទៅ​ចួបជុំលោកតា លោកយាយ ឪពុកម្តាយ បង ប្អូន និងញាតិមិត្ត ក្នុង​ឱកាស​ពិធី​បុណ្យ​ភ្ជុំបិណ្ឌ ​ដែលនឹងត្រូវបញ្ចប់ក្នុងរយៈពេលពីរថ្ងៃទៀត។

ក្នុងពេលធ្វើដំណើរប្រជាពលរដ្ឋបានប្រាប់BTVឱ្យដឹងថា ពេលទៅដល់ស្រុកកំណើត នឹង​យក​ថវិកា ភេសជ្ជៈ និងសម្ភារផ្សេងៗទៀតទៀតជូនឪពុកម្តាយ បងប្អូនសាច់ញតិ និងរៀប​ចំ​ចង្ហាន់​ទៅ​វត្ត​ ប្រគេន​​ព្រះសង្ឃគង់នៅវត្តអារាម ក្នុងឱកាសពិធីបុណ្យភ្ជុំបិណ្ឌ។ លើសពីនេះ ប្រជាពលរដ្ឋ​បន្ត​ថា ​សម្រាប់ការធ្វើចរាចរណ៍នៅតាមផ្លូវជាតិលេខ១ ស្រួលធ្វើដំណើរមិនមានការកកស្ទុះនោះទេ ពោល​ដោយសារមានប៉ូលីសគាត់ជួយសម្រួលចរាចរណ៍ និងម្យ៉ាង​វិញ​ទៀត​ប្រជាពលរដ្ឋ​មួយ​ចំនួន​គាត់​បាន​ធ្វើដំណើរទៅស្រុកកំណើតមុនរួចរាល់ហើយ។

នគរបាលចរាចរណ៍បានឱ្យដឹងដែរថា ក្នុងឱកាសពិធីបុណ្យភ្ជុំបិណ្ឌនេះ ស្ថាន​ភាព​ចរាចរណ៍​នៅ​តាម​ដង​ផ្លូវជាតិលេខ១ ម្តុំខណ្ឌច្បារអំពៅ មានភាពមមាញឹកជាងពេលធម្មតា ប៉ុន្តែ​មិន​មាន​ការ​កក​ស្ទុះ​ចរាចរណ៍នោះទេ។ លើសពីនេះ លោកបានលើកឡើង​ពី​ការរៀប​ចំស​ម្រួល​ចរាចរណ៍​តាម​ផ្លូវ​ជាតិ​លេខ​១ផងដែរ។

ការធ្វើដំណើរតាមផ្លូវជាតិលេខ១ គឺភាគច្រើនប្រជាពលរដ្ឋមានស្រុកកំណើតនៅខេត្តកណ្តាល ព្រៃវែង និងស្វាយរៀង។ ជារៀងរាល់ឆ្នាំ នៅពេលដល់ថ្ងៃខែដែលត្រូវប្រារព្ធពិធីបុណ្យកាន់បិណ្ឌ និង​ភ្ជុំបិណ្ឌ គ្រប់បងប្អូនកូនចៅ សាច់ញាតិសន្ដានទាំងអស់ ទោះនៅទីជិត ឬទីឆ្ងាយ តែង​តែ​ធ្វើ​ដំណើរ​ទៅ​ជួបជុំគ្នា ជាពិសេសឪពុកម្ដាយ ដើម្បីរៀបចំម្ហូបអាហារ បាយសម្ល ចង្ហាន់ យក​ទៅ​ប្រគេន​ព្រះសង្ឃដែលគង់នៅវត្តអារាម។ នៅឆ្នាំ២០២៣ ពិធីបុណ្យកាន់បិណ្ឌ និងភ្ជុំបិណ្ឌ ចាប់​ផ្តើម​ពី​ថ្ងៃទី៣០ខែកញ្ញា រហូតដល់ថ្ងៃទី១៤ខែតុលា ដែលត្រូវនឹងថ្ងៃមួយរោច ដល់ថ្ងៃ១៥រោច ខែភទ្របទ ពុទ្ធសករាជ ២៥៦៧៕ អត្ថបទ៖ ទូច សោភ័ណ