តំបន់ហ្គាហ្សា ជាតំបន់ដែលមានមនុស្សជិត២,៣លាននាក់រស់នៅ មានទំហំ ៣៦៥គីឡូម៉ែត្រ​ក្រឡា អាចនឹងប្រឈមទៅនឹងវិបត្តិមនុស្សធម៌ធ្ងន់ធ្ងរបំផុត នៅក្នុងប្រវត្តិសាស្ត្រ​របស់​ខ្លួន​បន្ទាប់​ពី​អ៊ី​ស្រាអែល បានចេញបញ្ជាការហ៊ុមព័ទ្ធទាំងស្រុងនៅតំបន់ឆ្នេរនេះ។ រដ្ឋមន្ត្រីការពារជាតិអ៊ីស្រាអែល លោក Yoav Gallant បានចេញ​បញ្ជា​ការ​ឡោមព័ទ្ធ​ទាំងស្រុង​តំបន់​ហ្គាហ្សា កាលពីថ្ងៃចន្ទ ក្នុងការឆ្លើយតបទៅនឹង ការវាយប្រហារ​ដ៏​ឃោឃៅ​មក​លើ​ប្រទេស​អ៊ីស្រាអែល​ដោយក្រុមហាម៉ាស់ប៉ាឡេស្ទីនអ៊ីស្លាមនិយម ដែលគ្រប់គ្រងតំបន់ហ្គាហ្សា។

រដ្ឋមន្ត្រីថាមពលរបស់អ៊ីស្រាអែល លោក Israel Katz បានបង្គាប់​ឲ្យ​ក្រុម​ហ៊ុន​ផ្គត់ផ្គង់​ទឹក​ជាតិ​របស់​អ៊ីស្រាអែល Mekorot កាត់ផ្តាច់ការផ្គត់ផ្គង់ទឹកភ្លាមៗទៅកាន់តំបន់ហ្គាហ្សា ដោយ​លើក​ឡើង​ថា ការផ្គត់ផ្គង់អគ្គិសនី និងប្រេងឥន្ធនៈរបស់អ៊ីស្រាអែលទៅកាន់តំបន់នេះ បានកាត់​ផ្តាច់​រួច​ហើយ​កាល​ពីថ្ងៃអាទិត្យ។

ចំណាត់​ការទាំងនេះ ធ្វើឡើងបន្ទាប់ពី ការប្រយុទ្ធគ្នារវាង អ៊ីស្រាអែល និងក្រុម​សកម្ម​ប្រយុទ្ធ​តំបន់​ហ្គាហ្សា ក្រោយការវាយប្រហារដ៏ភ្ញាក់ផ្អើលទៅលើអ៊ីស្រាអែលកាលពីថ្ងៃសៅរ៍។ អ៊ីស្រាអែល បាន​គ្រប់​គ្រង​ភាគច្រើន នៃការផ្គត់ផ្គង់អគ្គិសនី និងទឹក ទៅកាន់តំបន់ហ្គាហ្សា ព្រមទាំងការនាំចេញ និង​នាំ​ចូលប្រេងឥន្ធនៈ ទំនិញ និងថ្នាំពេទ្យ ព្រមទាំងការឆ្លងកាត់របស់ពលរដ្ឋ ចូល​និង​ចេញ​ពី​តំបន់​នេះ។

តំបន់ហ្គាហ្សា បានស្ថិតនៅក្រោម ការរារាំងរបស់អ៊ីស្រាអែល ចាប់តាំងពីឆ្នាំ២០០៧ ភ្លាម​ៗ​បន្ទាប់​ពី​ក្រុម​ហាម៉ាស់ ទទួលជ័យជម្នះក្នុងការបោះឆ្នោត និងកាន់អំណាចនៅតំបន់ហ្គាហ្សា។ ទោះ​ជា​យ៉ាង​ណា ការរារាំង ត្រូវបានបន្ធូរបន្ថយរយៈពេលជាច្រើនឆ្នាំមកនេះ ដោយអ៊ីស្រាអែល និង ប្រទេស​អេហ្ស៊ីប គ្រប់គ្រងការផ្គត់ផ្គង់ទឹក អគ្គិសនី ប្រេងឥន្ធនៈ និងថ្នាំពេទ្យ រហូត​ដល់​ជម្លោះ​រីក​ធំ​ចុង​ក្រោយ​នេះ៕