យោធាអ៊ីស្រាអែលបាននិយាយថា ខ្លួនកំពុងធ្វើការវាយប្រហារទ្រង់ទ្រាយធំលើគោលដៅដែលជាកម្មសិទ្ធិរបស់ក្រុមហាម៉ាស នៅតំបន់ហ្គាហ្សា នាថ្ងៃព្រហស្បតិ៍ (ទី១២ ខែតុលា) ប៉ុន្តែមិនបានផ្តល់ព័ត៌មានលម្អិតនោះទេ ខណៈដែលរដ្ឋមន្ត្រីការបរទេសអាមេរិកលោក Antony Blinken បានធ្វើដំណើរទៅកាន់តំបន់ដើម្បីជួបមេដឹកនាំទាំងសងខាងនៃជម្លោះនេះ។

យោធាអ៊ីស្រាអែលបានឲ្យដឹងថា យន្តហោះអ៊ីស្រាអែលបានវាយប្រហារទៅគោលដៅនានា នៅតំបន់ហ្គាសា អស់រយៈពេលជាច្រើនថ្ងៃ ដែលជាការសងសឹក ចំពោះការវាយប្រហារកាលពីចុងសប្តាហ៍ពីសំណាក់ពួកសកម្មប្រយុទ្ធហាម៉ាស ដោយបានទម្លុះរបងព្រំដែនដែលព័ទ្ធជុំវិញ ហើយបានបាញ់រះទាំងកម្រោលតាមបណ្ដាទីប្រជុំជន និងភូមិនានា ក្នុងទឹកដីអ៊ីស្រាអែល រហូតបណ្ដាលឲ្យមនុស្សយ៉ាងហោចណាស់ ១.២០០នាក់ ស្លាប់ និងជាង ២.៧០០នាក់ រងរបួស ព្រមទាំងត្រូវបានចាប់ជាចំណាប់ថ្នូរច្រើននាក់ទៀត។

នៅវេលាម៉ោងប្រហែល ៤ និង ៣០នាទីព្រឹកថ្ងៃព្រហស្បតិ៍ យោធាអ៊ីស្រាអែលបានប្រាប់ថា ខ្លួនកំពុងធ្វើ «ការវាយប្រហារទ្រង់ទ្រាយធំ» លើគោលដៅដែលជាកម្មសិទ្ធិរបស់ក្រុមហាម៉ាសនៅក្នុងតំបន់ហ្គាហ្សា។ប្រព័ន្ធផ្សព្វផ្សាយរបស់ក្រុមហាម៉ាស បានរាយការណ៍ថា ជនជាតិប៉ាឡេស្ទីន ១៥នាក់ ត្រូវបានសម្លាប់ និងជាច្រើននាក់ទៀត រងរបួស នៅក្នុងការវាយប្រហារតាមអាកាសរបស់អ៊ីស្រាអែលនេះ។

សាក្សីដែលបានឃើញផ្ទាល់ភ្នែក បានប្រាប់ថា យន្តហោះអ៊ីស្រាអែលបានទម្លាក់គ្រាប់បែកយ៉ាងសន្ធាប់ទៅលើទីក្រុងហ្គាសា ហើយអាជ្ញាធរតំបន់ហ្គាសា ក៏បានរាយការណ៍ពីការវាយប្រហារតាមអាកាសលើជំរុំជនភៀសខ្លួន Jabalia នៅភាគខាងជើងតំបន់នេះដែរ។ បើតាមប្រព័ន្ធផ្សព្វផ្សាយប៉ាឡេស្ទីន នៅមុននេះ ដោយដកស្រង់សម្ដីពីក្រសួងសុខាភិបាលរបស់តំបន់ហ្គាហ្សា បានឲ្យដឹងថា ចំនួនអ្នកស្លាប់បានកើនឡើងដល់ ១.២០០នាក់ ហើយអ្នករងរបួសប្រហែល ៥.៦០០នាក់៕