ភាពតានតឹងនៅព្រំដែនអ៊ីស្រាអែល-លីបង់ ហាក់ដូចជាកើនឡើងខ្ពស់នៅថ្ងៃព្រហស្បតិ៍នេះ ខណៈកងទ័ព រថក្រោះ និងយានយន្តរបស់អ៊ីស្រាអែល ត្រូវបានដាក់ពង្រាយ និងដាក់ឲ្យប្រចំាការ មួយថ្ងៃបន្ទាប់ពីអំពើហិង្សា នៅព្រំដែនរវាងអ៊ីស្រាអែល និងលីបង់ បានផ្ទុះឡើងសម្រាប់ថ្ងៃទី៤ កាលពីថ្ងៃពុធ ដោយការបាញ់ផ្លោងរបស់អ៊ីស្រាអែលទៅលើទីក្រុងនានារបស់លីបង់ ក្នុងការឆ្លើយតបទៅនឹងការវាយប្រហារដោយរ៉ុក្កែត ធ្វើឡើងដោយក្រុម Hezbollah គាំទ្រដោយប្រទេសអ៊ីរ៉ង់។ ក្រុម Hezbollah បាននិយាយថាខ្លួនបានបាញ់មីស៊ីលស៊ីបគោលដៅ ទៅលើទីតាំងរបស់អ៊ីស្រាអែល ក្នុងការឆ្លើយតបទៅនឹងការសម្លាប់សមាជិករបស់ខ្លួនក្នុងការបាញ់ផ្លោងរបស់អ៊ីស្រាអែលកាលពីដើមសប្តាហ៍នេះ ដោយសន្យាឆ្លើយតបខ្លាំងៗចំពោះការវាយប្រហារមកលើទឹកដីរបស់លីបង់ ជាពិសេសជាការវាយប្រហារដ៏ឃោឃៅ។

យោធាអ៊ីស្រាអែល និយាយថា ខ្លួនបានវាយលុកលើទីតាំងក្រុម Hezbollah ដោយការវាយប្រហារតាមអាកាស និងបានវាយប្រហារលើប្រទេសលីបង់ បន្ទាប់ពីប៉ុស្តិ៍យោធាមួយកន្លែងនៅជិតទីក្រុង Arab al-Aramshe របស់អ៊ីស្រាអែល ត្រូវបានដាក់គោលដៅដោយការបាញ់ប្រឆាំងរថក្រោះកាលពីថ្ងៃពុធ។ ប្រភពសន្តិសុខប្រទេសលីបង់ និយាយថា ក្រុម Hezbollah បានបាញ់មីស៊ីលស៊ីបគោលដៅ២គ្រាប់ចូលទៅក្នុងប្រទេសអ៊ីស្រាអែល ដែលក្រុមនេះគិតថាជាសត្រូវក្នុងសម្បថរបស់ខ្លួន។

ក្រុម Hezbollah និងក្រុមហាម៉ាស់ជាក្រុមនៅប៉ាឡេស្ទីន ទាំងពីរនេះបានអះអាងការវាយប្រហារពីប្រទេសលីបង់ កាលពីថ្ងៃអង្គារ។ ក្រុម Hezbollah បានបាញ់មីស៊ីលស៊ីបគោលដៅ ទៅលើរថក្រោះរបស់អ៊ីស្រាអែល ដោយបានបង្ហោះវីដេអូពីការបំផ្លាញរបស់ខ្លួន ហើយក្រុមហាម៉ាស់ បាននិយាយថាខ្លួនបានបាញ់រ៉ុក្កែត ពីតំបន់ Al-Koleilah ចូលទៅក្នុងប្រទេសអ៊ីស្រាអែល។