ឯកអគ្គរដ្ឋទូតអ៊ីស្រាអែលប្រចាំប្រទេសជប៉ុន បាននិយាយនៅថ្ងៃព្រហស្បតិ៍នេះថា ប្រទេសម្ចាស់ផ្ទះរបស់លោកគួរតែ«ប្រុងប្រយ័ត្ន»ហើយពិនិត្យមើលអ្វីដែលក្រុមហាម៉ាស កំពុងធ្វើជាមួយនឹងជំនួយដែលខ្លួន ពង្រីកដល់ប្រជាជនប៉ាឡេស្ទីន។

យោធាអ៊ីស្រាអែល បាននិយាយថា ពួកសកម្មប្រយុទ្ធហាម៉ាស បានទម្លាយរបងព្រំដែន ដែលព័ទ្ធជុំវិញតំបន់ហ្គាហ្សាស្ទ្រីបកាលពីចុងសប្តាហ៍ ដោយបានវាយលុកតាមទីប្រជុំជន និងភូមិនានា និងបានសម្លាប់មនុស្សចំនួន ១.២០០នាក់ ខណៈចាប់ចំណាប់ថ្នូរជាច្រើននាក់។

ប្រព័ន្ធផ្សព្វផ្សាយប៉ាឡេស្ទីន បានរាយការណ៍ ដោយដកស្រង់សម្តីរបស់ក្រសួងសុខាភិបាលប៉ាឡេស្ទីនថា យន្តហោះចម្បាំងរបស់អ៊ីស្រាអែល បានវាយលុកលើគោលដៅជាច្រើននៅតំបន់ហ្គាហ្សាអស់រយៈពេលជាច្រើនថ្ងៃ ជាការសងសឹក ហើយចំនួនអ្នកស្លាប់នៅទីនោះ បានកើនឡើងដល់ ១.២០០នាក់។ 

លោក Gilan Cohen បាននិយាយនៅក្នុងសន្និសីទសារព័ត៌មានមួយថា៖« ប្រទេសជប៉ុន គួរតែមានការប្រុងប្រយ័ត្ន និងពិនិត្យមើលនូវអ្វីដែលក្រុមហាម៉ាសកំពុងធ្វើជាមួយនឹងជំនួយនេះ»។ លោក បានសរសើរប្រទេសជប៉ុនដែលបានទទួលស្គាល់ការវាយប្រហាររបស់ក្រុមហាម៉ាសថាជាអំពើភេរវកម្ម ហើយលោកបាននិយាយថា អ៊ីស្រាអែល មានសិទ្ធិការពារខ្លួន។