ភ្នំពេញ៖ វត្តល្អក់ ឬ អារញ្ញរង្សី ស្ថិតក្នុងឃុំកណ្តែក ស្រុកប្រាសាទបាគង ខេត្តសៀមរាប មានអាយុកាលប្រមាណ ៩០ឆ្នាំ និងជាកេរដំណែលដ៏ពិសិដ្ឋ។ នេះបើតាមអាជ្ញាធរជាតិអប្សរាផ្សព្វផ្សាយឱ្យដឹងនៅថ្ងៃទី១២ ខែតុលា ឆ្នាំ២០២៣។

ប្រភពដដែលបន្តថា ព្រះវិហារបុរាណជាទីសក្ការៈមួយនេះ មានទម្រង់ស្ថាបត្យកម្ម និងសិល្បៈដ៏ល្អ និងរស់រវើកប្លែក។ សំណង់នេះសង់ឡើងអំពីឈើ រួមមានសសរខាងក្នុង និងគ្រឿងបង្គុំដំបូល លើកលែងតែជញ្ជាំង និងសសរជុំវិញតួព្រះវិហារ ដែលបានសង់ឡើងអំពីឥដ្ឋ។ ដំបូលព្រះវិហារមានសណ្ឋានជាដំ បូលកឹង ប្រក់ក្បឿងស្រកាលេញ និងមានជហ្វាចំនួនបួន ដែលជហ្វានេះសាងសង់អំពីឈើ ហើយមានសណ្ឋានជារូបនាគពេញលេញ និងប្លែកត្រង់គែនៃជហ្វា បានឆ្នៃឆ្លាក់ជារូបមុខមនុស្ស។

ចំពោះហោជាងសងខាងនៃព្រះវិហារ ត្រូវបានសាងអំពីឈើ។ ហោជាងខាងកើត មានឆ្លាក់រូបព្រះចូ ឡាមណីចេតិយ នៅឋានត្រ័យត្រិង្ស គឺឋានសួគ៌ជាន់ទី២ ដែលតម្កល់ព្រះកេសាព្រមទាំងស្នៀតព្រះកេស និងព្រះចង្កូមកែវខាងស្តាំ នៃព្រះសក្យមុនីសម្មាសម្ពុទ្ធ។

បច្ចុប្បន្នព្រះវិហារនេះកំពុងជួសជុល និងអភិរក្សឡើងវិញ ដើម្បីរក្សានូវស្នាដៃដែលជាកេរដំណែលដ៏ពិ សិដ្ឋ ដែលស្តែងឡើងតាមរយៈស្ថាបត្យកម្ម និងជាមរតករបស់បុព្វការីជនយើងឱ្យនៅគង់វង្សជាបន្តទៅទៀត៕ ដោយ៖ គង់ ឌិន