​ភ្នំពេញ៖ ផ្សារដើមគថ្មីនឹងបើកដំណើរការឆាប់ៗនេះហើយ ខណៈមានអាជីវករប្រមាណ ៧០ភាគរយបានមកចុះឈ្មោះអាជីវកម្ម សម្រាប់អាជីវករ នឹងទទួលបានការលក់រយៈពេល ២ឆ្នាំដោយឥតគិតថ្លៃ។

​ទីក្រុងពាណិជ្ជកម្មអាស៊ាន-អន្តរជាតិ ឬហៅថា ផ្សារដើមគរថ្មីនឹងបើកដំណើរការឆាប់ៗនេះហើយ គិតមកដល់ពេលនេះ តូបផ្សារមានអាជីវករប្រមាណ ៧០ភាគរយហើយបានមកចុះឈ្មោះដំណើរការអាជីវកម្ម។ នេះបើតាមលោក JIN FAN ប្រធានគ្រប់គ្រងផ្នែកទីផ្សាររបស់ផ្សារដើមគរថ្មីបានប្រាប់នៅរសៀលថ្ងៃទី១២ ខែតុលា ឆ្នាំ២០២៣ បន្ទាប់ពីមានដំណើរទស្សនកិច្ចរបស់ឯកឧត្តម វ៉ាង វិនធាន ឯកអគ្គរដ្ឋទូតចិនប្រចាំនៅកម្ពុជា និងឯកឧត្តម ឃួង ស្រេង អភិបាលរាជធានីភ្នំពេញ នៅក្នុងតំបន់ទីក្រុងពាណិជ្ជកម្មអាស៊ាន-អន្តរជាតិ។

លោក JIN FAN បានបន្ថែមថា អាជីវករនឹងទទួលបានការបើកលក់រយៈពេល២ឆ្នាំដោយឥតគិតថ្លៃតូប ហើយតូបស្តង់នីមួយៗ គឺមានបន្ទប់ស្នាក់នៅខាងលើ។ ផ្សារដើមគរថ្មីនេះ គឺមានបោះដុំទំនិញគ្រប់មុខ និងបន្លែផ្លែឈើមកពីប្រទេសចិន ថៃ ឡាវ វៀតណាម និងកម្ពុជាផ្ទាល់។

ខណៈអញ្ជើញទស្សនកិច្ចផ្សារដើមគរថ្មីនេះ ឯកឧត្តម ឃួង ស្រេង អភិបាលរាជធានីភ្នំពេញបានឱ្យដឹងថា ផ្សារដើមគរថ្មីនេះ នឹងធ្វើឱ្យរាជធានីភ្នំពេញប្រែមុខមាត់ថ្មីមួយទៀតតាមរយៈការអភិវឌ្ឍនេះ ព្រោះជាផ្សារបោះដុំធំជាងគេនៅភ្នំពេញ។ ផ្សារដើមគរថ្មីនៅមានផ្ទៃដីប្រមាណ២០ហិកតា និងមានរៀបចំសំណង់អាគារស្អាតរៀបរយ រួមទាំងហេដ្ឋារចនាសម្ព័ន្ធ ដែលនឹងផ្ដល់ឱ្យអាជីវករអាចធ្វើអាជីវកម្មបានរីកចម្រើន។

ឯកឧត្តម ឃួង ស្រេង បញ្ជាក់ថា រដ្ឋនិងជំរុញការអភិវឌ្ឍនេះឱ្យស្របទៅតាមការរីកចម្រើនរបស់ទីក្រុង ក្នុងការគិតគូរពីរបៀបរៀបរយតាមដងផ្លូវក៏ស្ថិតក្នុងគម្រោងផ្សារដើមគរថ្មីនេះផងដែរ គឺនឹងឱ្យអ្នកលក់ដូរតាមផ្លូវក្បែរផ្សារដើមគរក្នុងខណ្ឌទួលគោកមកលក់ដូរនៅផ្សារដើមគរថ្មីនេះវិញ ដើម្បីសោភ័ណភាពទីក្រុង និងរបៀបរៀបរយតាមទីសាធារណៈ ព្រោះថា ផ្សារដើមគរថ្មីនេះគឺនៅជាប់មហាវិថីឈ្នះ ឈ្នះ ដែលមានការតភ្ជាប់គ្នាជាមួយផ្លូវក្រវាត់ក្រុងទី៣ ដែលអាចចរាចរណ៍រថយន្តដឹកទំនិញ បន្លែត្រីសាច់បានយ៉ាងងាយស្រួល និងមិនបណ្ដាលឱ្យចរាចរណ៍មមាញឹកក្នុងទីក្រុងផង។

ឯកឧត្តម វ៉ាង វិនធាន បានអបអរសាទរចំពោះគម្រោងវិនិយោគផ្សារបោះដុំដ៏ធំលើកដំបូងនៅរាជធានីភ្នំពេញមួយនេះ។ ឯកឧត្តមញ្ជាក់ថា នេះជាការបង្ហាញឱ្យឃើញពីចំណងមិត្តភាព សាមគ្គីភាព និងកិច្ចសហប្រតិបត្តិការនៃយុទ្ធសាស្ត្រ ត្បូងពេជ្រកម្ពុជា ចិន ដែលផ្តួចផ្តើមឡើងដោយប្រមុខដឹកនាំនៃប្រទេសទាំងពីរ ហើយស្ថានទូតចិន នឹងបន្តកិច្ចសហការវិនិយោគនៅរាជធានីភ្នំពេញតាមរយៈការជំរុញវិនិយោគិនរបស់ចិនមកវិនិយោគនៅកម្ពុជា និងនិយាយដោយឡែកគឺនៅរាជធានីភ្នំពេញឱ្យកាន់តែច្រើនថែមទៀត។

សូមជម្រាបថា ផ្សារដើមគរថ្មី គឺស្ថិតនៅជាប់មហាវិថី ឈ្នះ ឈ្នះ ក្នុងសង្កាត់គោករកា ខណ្ឌព្រែកព្នៅ ដែលនៅលើដីតំបន់បឹងតាមោក៕ អត្ថបទ ៖ ប្រាក់ វ៉ាន់ដា​