អគ្គលេខាធិការអង្គការណាតូ លោក Jens Stoltenberg បាននិយាយកាលពីថ្ងៃពុធ (ទី១១ ខែតុលា) ថា ខណៈដែលអ៊ីស្រាអែលមានសិទ្ធិការពារខ្លួនប្រឆាំងនឹងការវាយប្រហារ លោករំពឹងថា ការឆ្លើយតបចំពោះការវាយប្រហារចុងសប្តាហ៍របស់ក្រុមហាម៉ាស នឹងធ្វើឡើងដោយមានការថ្លឹងថ្លែងយ៉ាងសមរម្យ។

លោក Stoltenberg បានប្រាប់អ្នកសារព័ត៌មានថា៖ «ខ្ញុំរំពឹងថា ពិតមែនហើយ នៅពេលដែលយើងឃើញការឆ្លើយតបរបស់អ៊ីស្រាអែល វានឹងត្រូវបានធ្វើឡើងដោយថ្លឹងថ្លែងយ៉ាងសមរម្យ ហើយខណៈដែលជម្លោះនេះនៅតែបន្តមាន វាមានសារៈសំខាន់ណាស់ ក្នុងការធ្វើអ្វីៗគ្រប់យ៉ាង ដែលអាចធ្វើទៅបាន ដើម្បីការពារការបាត់បង់ជីវិតជនស៊ីវិលស្លូតត្រង់»។

សូមរំលឹកថា ខ្មាន់កាំភ្លើងរបស់ក្រុមហាម៉ាស បានសម្រុកចូលបាញ់រះពេញទីក្រុងរបស់អ៊ីស្រាអែល កាលពីចុងសប្តាហ៍ ដោយបានសម្លាប់មនុស្សចំនួន ១.២០០នាក់ និងចាប់ជាចំណាប់ថ្នូរជាច្រើននាក់នាំយកទៅកាន់តំបន់ហ្គាហ្សា។ អ៊ីស្រាអែលបានសងសឹកជាមួយនឹងការវាយប្រហារតាមអាកាស ដែលបានសម្លាប់មនុស្សជាង ១.០០០នាក់ នៅក្នុងតំបន់ហ្គាហ្សាដែលគ្រប់គ្រងដោយក្រុមហាម៉ាស ខណៈដែលខ្លួនរៀបចំត្រៀមសម្រាប់ការវាយលុកផ្លូវគោក ដែលអាចកើតមាន៕