ទីប្រឹក្សាពិសេសផ្នែកសិទ្ធិជនមានពិការភាពអន្តរជាតិ នៃក្រសួងការបរទេស សហរដ្ឋអាមេរិក បានលើកឡើងជាការស្វាគមន៍លើការផ្ដល់ជាជំនួយបច្ចេកទេស ជួយដល់វិស័យពិការភាពនៅកម្ពុជា។ នេះជាការលើកឡើង កំឡុងពេលជួបពិភាក្សាការងារ ជាមួយមន្រ្តីជាន់ខ្ពស់ ក្រសួងសង្គមកិច្ច អតីតយុទ្ធជន និងយុវនីតិសម្បទា របស់កម្ពុជា ដែលធ្វើឡើងនៅប្រទេសឥណ្ឌូនេស៊ី នៅថ្ងៃទី១១ ខែតុលានេះ។
ក្នុងជំនួបនេះ ពិភាក្សាការងារនេះ ឯកឧត្តម ឯម ច័ន្ទមករា រដ្ឋលេខាធិការក្រសួងសង្គមកិច្ច បានជម្រាបជូនលោកជំទាវ សារ៉ា មិនការ៉ា ទីប្រឹក្សាពិសេសផ្នែកសិទ្ធិជនមានពិការភាពអន្តរជាតិ នៃក្រសួងការបរទេសសហរដ្ឋអាមេរិក ថា បច្ចុប្បន្ននេះ កម្ពុជាគឺជាប្រទេសកំពុងអភិវឌ្ឍ ដូច្នេះការរៀបចំហេដ្ឋារចនាសម្ព័ន្ធ គឺបាននិងកំពុងបង្កលក្ខណៈងាយស្រួល សម្រាប់ជនមានពិការភាព មានការរៀបចំផ្លូវថ្មើជើង សម្រាប់ជនពិការភ្នែក ហើយនៅតាមក្រសួង-ស្ថាប័នរដ្ឋក៏ដូចជាឯកជន រួមទាំងនៅតាមបណ្តាសណ្ឋាគារ ផ្ទះសំណាក់ រមណីយដ្ឋាន កន្លែងកំសាន្តនានាក៏បាននិងកំពុងរៀបចំនូវផាសុកវត្ថុដែលរួមមានជណ្តើរយោង ចំណតយានយន្ត បន្ទប់ទឹកមានធ្នាក់ដៃជាដើម សម្រាប់ជនមានពិការភាព។
ឯកឧត្តម បន្តថា បច្ចុប្បន្ននេះក្រសួងសង្គមកិច្ច និងអគ្គលេខាធិការដ្ឋានក្រុមប្រឹក្សាសកម្មភាពជនពិការ កំពុងរៀបចំសេចក្តីព្រាងច្បាប់ថ្មីសម្រាប់វិស័យពិការភាព ន័យនេះ គឺជាការវិវឌ្ឍថ្មីមួយទៀត ក្នុងវិស័យពិការភាពនៅកម្ពុជា។ ឯកឧត្តម ឯម ច័ន្ទមករា បានស្នើដល់ភាគីសហរដ្ឋអាមេរិកចូលរួមជួយផ្នែកបច្ចេកទេសដើម្បីត្រៀមការអនុវត្តច្បាប់នេះនាពេលខាងមុខ។
ជាមួយគ្នានោះ ឯកឧត្តម បានស្នើដល់រដ្ឋាភិបាលសហរដ្ឋអាម៉េរិក ជួយពង្រឹងសមត្ថភាពអំពីការលើកកម្ពស់សិទ្ធិជនមានពិការភាពដល់អ្នកជំនាញច្បាប់រួមមានមេធាវី ចៅក្រម ព្រះរាជអាជ្ញា និងមន្ត្រីនគរបាលយុត្តិធម៌។ ឯកឧត្តមរដ្ឋលេខាធិការ ឯម ច័ន្ទមករា ក៏បានស្នើដល់ភាគីសហរដ្ឋអាមេរិក ចូលរួមជួយកផ្នែកបច្ចេកទេសដល់ក្រសួងសង្គមកិច្ច អតីតយុទ្ធជន និងយុវនីតិសម្បទា ក៏ដូចជាក្រុមប្រឹក្សាសកម្មភាពជនពិការក្នុងការអនុវត្តផែនការយុទ្ធសាស្ត្រស្តីពីពិការភាព និងការអនុវត្តអនុសញ្ញា ស្តីពីសិទ្ធិជនមានពិការភាពនៅកម្ពុជា។ លើសពីនេះ ក៏ស្នើសុំពិនិត្យលទ្ធភាពផ្តល់ជំនួយជួយកម្ពុជាក្នុងការរៀបចំនូវហេដ្ឋារចនាសម្ព័ន្ធ ការបង្កលក្ខណៈងាយស្រួយ ឬផាសុកវត្ថុ សម្រាប់ជនមានពិការភាពនៅកម្ពុជា តាមរយៈការអនុវត្តគម្រោងសាកល្បងក្នុងខេត្តណាមួយនៅ។
ជាការឆ្លើយតបលោកជំទាវ សារ៉ា មិនការ៉ា ទីប្រឹក្សាពិសេសផ្នែកសិទ្ធិជនមានពិការភាពអន្តរជាតិ នៃក្រសួងការបរទេស សហរដ្ឋអាម៉េរិក បានសម្តែងនូវការចាប់អារម្មណ៍ និងរីករាយទទួលស្វាគមន៍ចំពោះសំណើរផ្លូវការពីការក្រសួងសង្គមកិច្ច អតីតយុទ្ធជន និងយុវនីតសម្បទា នៃព្រះរាជាណាចក្រកម្ពុជា ដើម្បីធ្វើកិច្ចការងារដ៏មានសារៈសំខាន់នេះជាមួយស្ថានទូតសហរដ្ឋអាមេរិកប្រចាំនៅកម្ពុជា។ លោកជំទាវ សារ៉ា មិនការ៉ា ក៏បានបង្ហាញអំពីចំណាប់អារម្មណ៍ ដើម្បីអញ្ជើញធ្វើទស្សនកិច្ចមកព្រះរាជាណាចក្រកម្ពុជាផងដែរ។
លោកជំទាវ សារ៉ា មិនការ៉ា មានប្រសាសន៍បញ្ជាក់ថា “កម្ពុជាពិតជាដៃគូសំខាន់របស់យើង។ យើងប្តេជ្ញាចិត្តចំពោះពិការភាព មិនត្រឹមតែនៅក្នុងតំបន់អាស៊ានប៉ុណ្ណោះទេ ថែមទាំងលើទ្វេភាគីជាមួយប្រទេសកម្ពុជា ដូច្នេះខ្ញុំគិតថាមានការងារល្អដែលត្រូវធ្វើ”៕ អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
