សភារបស់ប្រទេសអ៊ីស្រាអែល បានអនុម័តរដ្ឋាភិបាលរួបរួមគ្រាអាសន្នរបស់នាយករដ្ឋមន្ត្រី លោក Benjamin Netanyahu កាលពីថ្ងៃព្រហស្បតិ៍ រួម​មាន​ទាំង​សមាជិក​សភា​បក្ស​ប្រឆាំង​និយម​កណ្តាល​មួយ​ចំនួន ដើម្បីបង្ហាញការ​ប្តេជ្ញា​ចិត្ត​របស់​ខ្លួន​ក្នុង​ការ​ប្រយុទ្ធ​ប្រឆាំង​សង្រ្គាម​ជាមួយ​ក្រុម​ហាម៉ាស​នៅតំបន់ហ្គាហ្សា។

រដ្ឋាភិបាល ត្រូវបាន​អនុម័ត​បន្ទាប់​ពី​ការ​វាយប្រហារ​កាល​ពី​ថ្ងៃសៅរ៍​ដោយ​ក្រុម​សកម្ម​ប្រយុទ្ធ​អ៊ីស្លាម​និយម Hamas ដែលគ្រប់គ្រងតំបន់ហ្គាហ្សា បាន​បញ្ជាក់​ពីការព្យួរ​ច្បាប់​នយោបាយ​ធម្មតា​ក្នុង​អំឡុង​ពេល​វិបត្តិធ្ងន់ធ្ងរបំផុតមួយក្នុងប្រវត្តិសាស្ត្ររបស់ប្រទេសអ៊ីស្រាអែល។ នៅ​ក្រោម​កិច្ច​ព្រម​ព្រៀង​នេះ អតីតរដ្ឋមន្ត្រីក្រសួងការពារជាតិ លោក Benny Gantz និងសមាជិក​គណបក្ស​និយម​កណ្តាល​តូច​មួយរបស់លោក នឹងចូលរួមជាមួយក្រុមចម្រុះរបស់លោក Netanyahu ជា​រដ្ឋាភិបាល​ស្តាំនិយម នៅក្នុងប្រវត្តិសាស្ត្ររបស់អ៊ីស្រាអែល ដែលលោក Gantz ធ្លាប់​បាន​ប្រឆាំង​យ៉ាង​ខ្លាំង​កាលពីពេលមុន។

ពលរដ្ឋអ៊ីស្រាអែលជាង ១.៣០០នាក់ ត្រូវបានសម្លាប់​នៅ​ក្នុង​ការ​វាយ​ប្រហា​រនេះ ហើយជាង ១០០នាក់ ត្រូវបានចាប់ជាចំណាប់ថ្នូរនៅក្នុងតំបន់ហ្គាហ្សា ដោយ​មាន​ហេតុការណ៍​ដ៏​គួរ​ឱ្យ​រន្ធត់​លេច​ចេញជា​បណ្តើរៗពីគណនីរបស់អ្នកនៅរស់រានមានជីវិត និងវីដេអូតាមទូរស័ព្ទចល័ត។ ទិដ្ឋភាព​នយោបាយរបស់អ៊ីស្រាអែល ដែលបានបែកបាក់គ្នាយ៉ាងជូរចត់អស់រយៈពេលជាច្រើនខែ ជុំវិញ​ការ​ជំរុញដ៏ចម្រូងចម្រាស់ក្តៅគគុកដោយរដ្ឋាភិបាលរបស់ លោក Netanyahu ដើម្បី​ផ្លាស់​ប្តូរ​ប្រព័ន្ធ​តុលាការ ជំរុញឱ្យមានជម្លោះរវាងក្រុមអ្នកគាំទ្រជាតិនិយមសាសនារបស់នាយករដ្ឋមន្ត្រី និង​ប្រជាជនអ៊ីស្រាអែល ដែលប្រកាន់លទ្ធិសេរីនិយម មិនទាក់ទងសាសនា។ មេដឹកនាំគណបក្សប្រឆាំងដ៏ធំបំផុតនៅក្នុងសភា អតីតនាយករដ្ឋមន្ត្រីលោក Yair Lapid បាន​បដិសេធ​មិន​ចូលរួមក្នុងរដ្ឋាភិបាលរួបរួម ដែលរួមមានក្រុមស្តាំនិយមជ្រុល ក្នុងចំណោមពួកគេ គឺ​រដ្ឋ​មន្ត្រី​សន្តិសុខ លោក Itamar Ben-Gvir៕