ភ្នំពេញ៖ ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋហ្វីលីពីនប្រចាំកម្ពុជា បាន​លើក​ឡើង​ពី​សំណើបន្ត MoU រវាងហ្វីលីពីន និងកម្ពុជា ក្នុង​ចេតនា​បង្កើន​កិច្ច​សហប្រតិបត្តិ​វិនិយោគ​លើ​វិស័យកសិកម្មនៅកម្ពុជា។

សំណើខាងលើរបស់ លោកជំទាវ Maria Amelita C. Aquino ឯកអគ្គរដ្ឋទូតវិសាមញ្ញ និង​ពេញ​សមត្ថភាព នៃសាធារណរដ្ឋហ្វីលីពីនប្រចាំកម្ពុជា បាន​ធ្វើឡើង​ក្នុងជំនួបការងារជាមួយឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ នៅព្រឹកថ្ងៃទី១២ ខែ​តុ​លា ឆ្នាំ២០២៣ នៅទីស្តីការក្រសួងកសិកម្ម។

នាឱកាសនោះឯកឧត្តមរដ្ឋមន្ត្រី បានសម្តែងនូវការស្វាគមន៍ចំពោះសំណើបន្ត MoU ដោយ​ត្រូវ​ផ្តោត​លើ​អ្វីដែលប្រទេសទាំងពីរអាចធ្វើបានជាមួយគ្នា ជាពិសេស​ជំរុញ​ការ​ធ្វើ​ពាណិជ្ជ​កម្ម​ក្នុង​វិស័យ​កសិកម្ម។ ជាមួយគ្នានេះដែរ ឯកឧត្តម បានគូសបញ្ជាក់​អំពី​សក្តានុពល នៃ​វិស័យ​កសិកម្ម​កម្ពុជា និងការកែច្នៃផលិតផលកសិកម្មសម្រាប់នាំចេញ (Downstream)។

បើតាមឯកឧត្តមរដ្ឋមន្ត្រី ថ្វីត្បិតតែកម្ពុជាជាប្រទេសតូច តែមានសក្តានុពល និងឱកាស​ទីផ្សារ​ធំ​ទូលាយ​ ជាពិសេសទីផ្សារប្រទេសអាស៊ាន និងប្រទេសចិនផងដែរ។ ទន្ទឹមនឹងនេះដែរ កម្ពុជា​ក៏​មាន​ច្បាប់​វិនិយោគដ៏គួរឱ្យទាក់ទាញ សម្រាប់ការវិនិយោគពីខាងក្រៅប្រទេសផងដែរ។

ភាគី​ទាំង​ពីរបានលើកឡើងអំពីការពិនិត្យលទ្ធភាព ក្នុងរៀបចំឱ្យមានទស្សនកិច្ចកម្រិតថ្នាក់ដឹកនាំ ក្នុង​ការ​ជំរុញកិច្ចសហប្រតិបត្តិការពាណិជ្ជកម្មកសិកម្មរវាងប្រទេសទាំងពីរ៕