កាលពីថ្ងៃពុធ (១២ តុលា) សហជីពកម្មករនៃសម្ព័ន្ធយានយន្ត (UAW) របស់សហរដ្ឋអាមេរិក បាន​បិទ​រោងចក្រដ៏ធំបំផុតរបស់ក្រុមហ៊ុនរថយន្ត Ford នៅទូទាំងពិភពលោក ដោយ​បញ្ឈប់​ការ​ផលិត​រថយន្ត​ភីកអាប់ ជាមួយនឹងមានការព្រមានតិចតួច នៅក្នុងការកើន​ឡើងយ៉ាង​ខ្លាំង​នៃ​កូដកម្ម ដែលមានគោលដៅរយៈពេល ៤សប្តាហ៍របស់សហជីពមួយនេះ ប្រឆាំង​នឹង​ក្រុមហ៊ុន​ផលិត​រថយន្តធំៗទាំងបីរបស់សហរដ្ឋអាមេរិក។

សហជីព UAW ​បាននិយាយថា សមាជិកសហជីពចំនួន ៨.៧០០នាក់ ធ្វើការនៅរោង​ចក្រ​រថយន្ត​ដឹក​ទំនិញ នៅរដ្ឋ Kentucky របស់ក្រុមហ៊ុនរថយន្ត Ford បានបន្តធ្វើកូដកម្ម បន្ទាប់​ពី​សហជីព​បាន​និយាយថា ក្រុមហ៊ុនផលិតរថយន្តដ៏ធំលេខ២ របស់សហរដ្ឋអាមេរិកមួយនេះ បាន​បដិសេធ​មិន​បន្ត​ការ​ចរចាជុំវិញកិច្ចសន្យាការងារ។

ក្រុមហ៊ុនផលិត​រថយន្តជាច្រើន បានផ្តល់ជូនការដំឡើងប្រាក់ឈ្នួលដំបូងច្រើនជាងពីរដង យល់​ព្រម​ដំឡើងប្រាក់ឈ្នួលក្នុងករណីមានអតិផរណា និងការ​ធ្វើ​ឱ្យ​ប្រសើរ​ឡើង​នូវ​ប្រាក់​ឈ្នួល​សម្រាប់​កម្មករ​បណ្តោះអាសន្ន ប៉ុន្តែសហជីពចង់បានប្រាក់ឈ្នួលខ្ពស់ជាងនោះទៀត ហើយពួក​គេ​ក៏​ចង់​បាន​ការ​លុបចោលប្រព័ន្ធប្រាក់ឈ្នួលពីរជាន់ និងការពង្រីក​សម្ព័ន្ធ​សហជីព​ទៅ​ជា​រោង​ចក្រ​ថាមពលថ្ម នៅក្រុមហ៊ុនរថយន្តទាំងបីនោះ។

ការស​ម្រេចរបស់ប្រធានសហជីពកម្មករនៃសម្ព័ន្ធយានយន្តអាមេរិក (UAW) លោក Shawn Fain ក្នុងការបិទបណ្តាញដំឡើង ដែលផលិតរថយន្តភីកអាប់ខ្នាតធំ និងរថយន្ត​ខ្នាត​តូច​របស់​ក្រុម​ហ៊ុន Ford គឺជាផលប៉ះពាល់យ៉ាងខ្លាំងដល់ក្រុមហ៊ុននេះ ដែលអាច​បំផ្លាញ​ប្រាក់​ចំណេញ​ពេញ​មួយ​ឆ្នាំរបស់ក្រុមហ៊ុនផលិតរថយន្តទំនើបធំជាងគេលំដាប់ទី២ របស់សហរដ្ឋអាមេរិក មួយ​នេះ​យ៉ាង​ឆាប់រហ័ស៕