ក្រុមមន្ត្រីបាននិយាយថា រដ្ឋាភិបាលអែលសាវ៉ាឌ័រ កាលពីថ្ងៃព្រហស្បតិ៍ (១២ តុលា) បាន​បើក​ទ្វារ​របស់មជ្ឈមណ្ឌលបង្ខាំងភេរវករ (CECOT) ដល់ក្រុមអ្នកសារព័ត៌មាន ជាទី​ដែល​សមាជិក​សកម្ម នៃ​ក្រុមឧក្រិដ្ឋកម្ម MS-13 ចំនួន ១២.០០០នាក់ និងក្រុមគូប្រជែងជនអន្ធពាល Barrio ត្រូវ​បាន​ឃុំខ្លួន ហើយអ្នកខ្លះត្រូវបានកាត់ទោស និងអ្នកផ្សេងទៀតកំពុងកាត់ទោស។

យោងតាម​ក្រុមអាជ្ញាធរបានឲ្យដឹងថា ពន្ធនាគារ CECOT ដែលមានសមត្ថភាពដាក់អ្នកទោស ៤០.០០០នាក់នេះ គឺជា «ពន្ធនាគារដ៏ធំបំផុតនៅទ្វីបអាមេរិក»។ សង្រ្គាម​ប្រឆាំង​នឹង​ក្រុម​ជន​អន្ធពាល​របស់ប្រធានាធិបតីអែលសាវ៉ាឌ័រ លោក Nayib Buekel បានធ្វើឱ្យមនុស្សជាង ៦៦.០០០នាក់ ត្រូវបានចាប់ដាក់ពន្ធនាគារ ហើយ​ធ្វើ​ឲ្យលោក​ទទួល​បាន​ប្រជាប្រិយ​ភាព​មិន​ធ្លាប់​មាន​ពី​មុនមក ប៉ុន្តែវាក៏បាននាំមកនូវការចោទប្រកាន់ពីអង្គការក្រៅរដ្ឋាភិបាលមួយចំនួន ពីបទ​រំលោភ​សិទ្ធិ​មនុស្ស និងការចរចាជាមួយឧក្រិដ្ឋជនខុសច្បាប់ផងដែរ។

សាច់ញាតិរបស់មនុស្សរាប់សិបនាក់ ដែលត្រូវបានអាជ្ញាធរឃុំខ្លួនក្នុងគ្រាមានអាសន្នរបស់រដ្ឋនោះ បាន​សុំ​ឱ្យ​តុលាការកំពូលកាលពីថ្ងៃព្រហស្បតិ៍ (១២ តុលា) បញ្ឈប់សេចក្ដីស្នើច្បាប់ ដែលនឹ​ង​អនុញ្ញាត​ឱ្យ​មានការកាត់ក្តីដ៏ធំសម្រាប់អ្នកទោស។

សាច់ញាតិជន​ស្លូតត្រង់ដែលត្រូវបានគេចាប់ខ្លួន បារម្ភខ្លាចសមាជិកក្រុមគ្រួសាររបស់ពួគេ ត្រូវ​បាន​យល់​ច្រឡំថាជាសមាជិកក្រុមជនអន្ធពាល ហើយអាចទទួលការថ្កោលទោសបែបនេះដែរ៕