ប្រធានអង្គការពាណិជ្ជកម្មពិភពលោក (WTO) លោកស្រី Ngozi Okonjo-Iweala បាន​និយាយ​កាល​ពី​ថ្ងៃព្រហស្បតិ៍ (១២ តុលា) ថា លោកស្រីសង្ឃឹមថា ជម្លោះអ៊ីស្រាអែល និងក្រុមហាម៉ាស អាច​ត្រូវបានបញ្ចប់យ៉ាងឆាប់រហ័ស ដោយព្រមានថាជម្លោះនោះ នឹងមាន «ផលប៉ះ​ពាល់​យ៉ាង​ធំធេង​»​ លើលំហូរពាណិជ្ជកម្មសកល ដែលមានសភាពខ្សោយរួចទៅហើយនោះ ប្រសិ​ន​បើ​ជម្លោះ​រីករាល​ដាល​ពាសពេញតំបន់នេះ។

លោកស្រីបាននិយាយថា «មានភាពមិនច្បាស់លាស់អំពីថា តើជម្លោះនឹងរីករាលដាលបន្ថែមទៀត ទៅ​កា​ន់តំបន់ទាំងមូល ដែលអាចជះឥទ្ធិពលយ៉ាងខ្លាំងដល់កំណើនសេដ្ឋកិច្ចពិភពលោក ឬ​យ៉ាង​ណា​នោះ​ទេ។ យើងសង្ឃឹមថាអំពើហិង្សាទាំងអស់ នឹងត្រូវបានបញ្ចប់ ដោយសារ​តែ​វា​បង្កើត​ភាព​មិន​ប្រាកដ​ប្រជាសម្រាប់សេដ្ឋកិច្ចពិភពលោកមួយនេះ»។

លោកស្រី Okonjo-Iweala ដែលកំពុងស្ថិតនៅប្រទេសម៉ារ៉ុក សម្រាប់កិច្ច​ប្រជុំ​ប្រចាំ​ឆ្នាំ​របស់​មូល​និធិ​រូបិយវត្ថុ​អន្តរជាតិ និងធនាគារពិភពលោកក្នុងសប្តាហ៍នេះ បានបន្ថែមថា ភាពមិន​ប្រាកដ​ប្រជាជា​សកល កំពុងកំណត់កំណើនពាណិជ្ជកម្មពិភពលោករួចមកហើយ ប៉ុន្តែវានឹងកាន់​តែ​ធ្ងន់ធ្ងរ​ឡើង​ដោយសារការចាប់ផ្តើមនៃសង្គ្រាមភ្លាមៗរវាងអ៊ីស្រាអែល និងក្រុមអ៊ីស្លាមនិយម ហាម៉ាស ដែលគ្រប់គ្រងតំបន់ហ្គាហ្សា ស្ទ្រីប មួយនោះ។

ប្រធាន WTO រូបនេះបាននិយាយថា អំពើហឹង្សានៅមជ្ឈិមបូព៌ា អាចបន្ថែម​ទៅ​លើ​កត្តា​ដែល​រារាំង​កំណើន​ពាណិជ្ជកម្ម រួមទាំងអត្រាការប្រាក់ខ្ពស់ ទីផ្សារអចលនទ្រព្យចិនដែលមានភាពតានតឹង និង​សង្គ្រាម​រុស្ស៊ីនៅអ៊ុយក្រែនផងដែរ៕