អង្គការសហប្រជាជាតិកាលពីថ្ងៃព្រហស្បតិ៍ បានចេញការអំពាវនាវបន្ទាន់មួយសម្រាប់ជំនួយ ២៩៤ លានដុល្លារអាមេរិក ដើម្បីដោះស្រាយ «តម្រូវការបន្ទាន់បំផុត» នៅក្នុងតំបន់ហ្គាហ្សា និង​តំបន់​កាន់កាប់ West Bank ជាកន្លែងដែលពលរដ្ឋប៉ាឡេស្ទីនជាង ៤០០.០០០នាក់ បាន​ភៀស​ខ្លួន​ចេញ​ពីលំនៅឋានរបស់ពួកគេក្នុងរយៈពេលប៉ុន្មានថ្ងៃថ្មីៗនេះ។ ការិយាល័យអង្គការសហប្រជាជាតិ សម្រាប់ការសម្របសម្រួលកិច្ចការមនុស្សធម៌ (OCHA) បាន​និយាយ​ថា មូលនិធិនេះនឹងត្រូវបានប្រើប្រាស់ដើម្បីជួយមនុស្សជាង ១,២ លាននាក់ និងបាន​និយាយ​ថា​ការ​ប្រយុទ្ធគ្នានាពេលថ្មីៗនេះនៅក្នុងតំបន់ បានធ្វើឱ្យក្រុមផ្តល់​ជំនួយ​ពុំ​មាន​ធន​ធាន​គ្រប់​គ្រាន់​។

ប្រទេសអ៊ីស្រាអែល បានសងសឹកដោយការវាយប្រហារតាមអាកាស និងកាំភ្លើង​ធំ​មក​លើ​តំបន់​ហ្កាហ្សា ​ជាតំបន់ដែលមានប្រជាជនរស់នៅយ៉ាងក្រាស់ក្រែល ២,៣ លាននាក់ បានបំផ្លាញអគារ និង​បានសម្លាប់មនុស្សជាង ១.៤០០ នាក់ ដែលភាគច្រើនជាជនស៊ីវិល។ អង្គការ OCHA បាន​និយាយ នៅក្នុងការអំពាវនាវរបស់ខ្លួនថា តម្រូវ​ការ​មនុស្ស​ធម៌​ដែល​លាយ​ឡំគ្នា​ដោយ​ការ​កើន​ឡើង​កាន់​តែ​ខ្លាំងកាលពីខែឧសភា ឆ្នាំ ២០២៣ នៅតំបន់ហ្គាហ្សា និងការធ្លាក់​ចុះ​កាន់​តែ​យ៉ាប់​យ៉ឺន​នៃ​ស្ថានភាពនៅតំបន់ West Bank បានធ្វើឱ្យ​អង្គការ​មនុស្ស​ធម៌​គ្មាន​ធន​ធាន​ដែល​ត្រូវ​ការ​ ដើម្បី​ឆ្លើយ​តបឱ្យបានគ្រប់គ្រាន់ទៅនឹងតម្រូវការពេញលេញ​របស់ពលរដ្ឋប៉ាឡេស្ទីន​ដែល​ងាយ​រង​គ្រោះ។​

កាលពីពេលមុន អង្គការសហប្រជាជាតិបានប៉ាន់ប្រមាណថា ខ្លួននឹងត្រូវការថវិកា ដើម្បី​ផ្តល់​មូល​និធិ​ប្រតិបត្តិការជួយដល់ពលរដ្ឋប៉ាឡេស្ទីនចំនួន ២.១ លាននាក់ ក្នុងឆ្នាំ ២០២៣ ជាគោល​ដៅ​ដែ​ល​បានផ្តល់ហិរញ្ញប្បទានមិនដល់ ៥០ ភាគរយ។ គ្រួសារជិត ៦០ ភាគរយនៅតំបន់ហ្គាហ្សា ត្រូវ​បានចាត់ទុកថាជួបអសន្តិសុខស្បៀងមុនពេលចាប់ផ្តើមនៃអរិភាពថ្មី៕