បន្ទាប់ពីជួបជាមួយរដ្ឋមន្ត្រីការបរទេសអាមេរិក លោក Antony Blinken សាច់ញាតិ​របស់​ពលរដ្ឋ​អាមេរិក​ដែល​បាត់ខ្លួន ឬជាប់ឃុំឃាំងបានអំពាវនាវឱ្យ «ដោះលែងចំណាប់ថ្នូរ និងអ្នក​ដែល​បាត់​ខ្លួន​ជាប​ន្ទាន់» កាលពីថ្ងៃព្រហស្បតិ៍ (១២ តុលា)។

អ្នកនាំពាក្យសេតវិមានបាននិយាយថា ចំនួនពលរដ្ឋអាមេរិក ដែលបាន​ស្លាប់​នៅ​ក្នុង​ការ​វាយ​ប្រហារ​របស់​ពួកហាម៉ាស ក្នុងប្រទេសអ៊ីស្រាអែល កាលពីចុងសប្តាហ៍បានកើនឡើងដល់ ២៧​នាក់ ហើយមនុស្ស១៤នាក់ទៀត នៅតែមិនទាន់ត្រូវបានសង្រ្គោះនៅឡើយ។

អ្នកស្រី Abbey Onn សាច់ញាតិម្នាក់របស់ជនជាតិអ៊ីស្រាអែលចំនួនប្រាំនាក់ ដែលបានបាត់ខ្លួន បាន​និយាយ​នៅក្នុងសន្និសីទសារព័ត៌មាននៅទីក្រុង Tel Aviv កាលពីថ្ងៃព្រហស្បតិ៍ថា «ក្នុងនាម​ជាជនជា​តិ​ជ្វីហ្វ ការប្រឆាំងនឹងពួកជ្រុលនិយម គឺជាប្រវត្តិសាស្ត្ររបស់យើងរាប់ពាន់ឆ្នាំមកហើយ ហើយ​អ្នក​ដែលត្រូវចាប់ខ្លួន និងបាត់ខ្លួនទាំងនោះសុទ្ធតែជាពលរដ្ឋស្លូតត្រង់»។

សេត​​វិមានបានបញ្ជាក់ថា ក្រសួងការបរទេសសហរដ្ឋអាមេរិក នឹងចាប់​ផ្តើម​ផ្តល់​ជើង​ហោះ​ហើរ​ធម្មនុញ្ញ​ទៅ​កាន់​អឺរ៉ុប ដើម្បីជួយជនជាតិអាមេរិក ចាកចេញពីប្រទេសអ៊ីស្រាអែល ប្រសិនបើ​ពួក​គេចង់​ចាក​ចេញ​ពីប្រទេសនោះ ចាប់ផ្តើមពីថ្ងៃសុក្រ (១៣ តុលា) នេះផងដែរ៕