កាលពីថ្ងៃព្រហស្បតិ៍ (១២ តុលា) ការស្ទង់មតិរយៈពេលយូរមួយបានបង្ហាញថា ចំនួនពលរដ្ឋអាល្លឺម៉ង់ ដែលភ័យខ្លាចថារដ្ឋាភិបាលរបស់ពួកគេអាចនឹងត្រូវជួបប្រទះបន្ទុកដ៏ធ្ងន់ធ្ងរ ដោយសារការដោះស្រាយបញ្ហាកំណើនជនអន្តោប្រវេសន៍ បានកើនឡើងយ៉ាងខ្លាំងនៅក្នុងឆ្នាំនេះ ទោះបីជាការព្រួយបារម្ភអំពីពន្ធ និងការចំណាយប្រចាំថ្ងៃនៅតែគ្របដណ្តប់ភាគច្រើនក៏ដោយ។
ជាលើកដំបូងហើយ ដែលការភ័យខ្លាចរបស់ប្រជាជនអំពីបញ្ហាអន្តោប្រវេសន៍ ត្រូវបានចែករំលែកនៅទូទាំងប្រទេស ដោយមិនផ្ដោតតែនៅក្នុងតំបន់ក្រីក្រនៃអតីតប្រទេសអាល្លឺម៉ង់ខាងកើតទេ នេះបើយោងតាមការស្ទង់មតិដោយក្រុមហ៊ុនធានារ៉ាប់រង RV។
អ្នកឆ្លើយសំណួរស្ទង់មតិសរុបចំនួន ៥៦% បាននិយាយថា ពួកគេភ័យខ្លាចរដ្ឋ និងស្ថាប័នរបស់ប្រទេសអាល្លឺម៉ង់ អាចនឹងជួបបន្ទុកដ៏លើសលប់ពីបញ្ហាអន្តោប្រវេសន៍ ដោយដាក់ការព្រួយបារម្ភនោះនៅចំណាត់ថ្នាក់ទី៤ ដែលកើនឡើងពីតួលេខ៤៥% និងចំណាត់ថ្នាក់ទី៩ កាលពីឆ្នាំមុន។
ចំណាត់ថ្នាក់ក្នុងកម្រិតទាបជាងមុននេះ គឺជាការភ័យខ្លាចថា បញ្ហាអន្តោប្រវេសន៍អាចបង្កឱ្យមានភាពតានតឹងក្នុងសង្គម ព្រមទាំងដាក់បន្ទុកលើរដ្ឋាភិបាល និងសេដ្ឋកិច្ចរបស់ប្រទេសអាល្លឺម៉ង់មួយនេះផងដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
