ប្រជាពលរដ្ឋនៅខេត្ដសៀមរាប សម្ដែងការសប្បាយរីករាយ ដែល​រដ្ឋាភិបាល​បាន​ផ្ដល់​រថយន្ដ​ក្រុងជិះដោយមិនគិតថ្លៃ ដោយពួកគាត់លើកថា បានជួយ​កាត់​បន្ថយ​ការ​ចំណាយ​ក្នុង​ការ​ធ្វើ​ដំណើរ​ដោយ​រថយន្ដឈ្នួល។

ប្រជា​ពលរដ្ឋ​ធ្វើដំណើរចេញពីក្រុងសៀមរាប ក៍ដូចធ្វើដំណើរមកកាន់ខេត្ដសៀមរាប បាន​លើក​ឡើង​ស្រដៀង​គ្នា​ថា ពួកគាត់ធ្លាប់ធ្វើដំណើរ​ទៅ​មក​ដោយ​ឥត​គិត​ថ្លៃ​ តាម​រយៈ​រថយន្ត​ក្រុង​ដែល​ផ្តល់​ដោយ​រាជរដ្ឋាភិបាលនេះជាច្រើនលើកមកហើយ ព្រោះបាន​ជួយ​កាត់​បន្ថយ​ការ​ចំណាយ​សម្រាប់​ថ្លៃ​ធ្វើដំ​ណើរបានច្រើន ខណៈដែលពួកគាត់មានសមាជិកធ្វើដំណើរច្រើន។ ពួក​គាត់​បន្ដ​ថា ​ការជ្រើសរើសសេវាកម្មរថយន្តក្រុងរបស់រាជរដ្ឋាភិបាលក្នុងរដូវកាលភ្ជុំបិណ្ឌនេះ វា​អាច​ឲ្យ​សន្សំ​ថវិកា​បាន​ខ្លះ​ ដើម្បីជួបជុំគ្រួសារ ហើយការធ្វើដំណើរតាមរថយន្តក្រុងនេះ មានសុវត្ថិភាព និង​ផា​សុខភាពល្អ និងបានសល់លុយជួយសម្រាលបន្ទុកបានមួយចំណែក។មួយវិញទៀត អ្នក​បើកបរ​មាន​ភាពរួសរាយរាក់ទាក់ ចេះជួយជញ្ជូនសម្ភារៈអ្នកដំណើរ រថយន្តមានម៉ាស៊ីនត្រជាក់ផងដែរ ។ ពួក​គាត់​បានសម្តែងនូវការសប្បាយចិត្ត និងថ្លែងនូវការអរគុណចំពោះរាជរដ្ឋាភិបាល ដែល​ផ្តល់​ជូន​រថយន្តដឹកពួកគាត់ដោយឥតគិតថ្លៃទាំងទៅទាំងមក និងសំណូមពរដល់ប្រមុខរាជរដ្ឋាភិបាល សម្តេច​ធិបតីហ៊ុន ម៉ាណែត បន្តផ្តល់ជូននូវសេវាកម្មនេះជាបន្តទៀត ។

សូមបញ្ជាក់ថា រាជរដ្ឋាភិបាលកម្ពុជា តាមរយៈសាលារាជធានីភ្នំពេញ បាន​ផ្តល់​រថយន្ត​ក្រុង​ចំនួន​ ១២០​គ្រឿង សម្រាប់ដឹកបងប្អូនប្រជាពលរដ្ឋ ដែលធ្វើដំណើរចេញពីរាជធានីភ្នំពេញ តាម​ផ្លូវ​ជាតិ​លេខ​៦ ទៅកាន់ខេត្ដសៀមរាប ក្នុងរដូវភ្ជុំបិណ្ឌដោយឥតគិតថ្លៃ។ ការផ្តល់ជូននេះ ត្រូវ​បាន​ប្រជាពលរដ្ឋ​លើក​ឡើងថា បានផ្តល់​ឱកា​ស​ធំធេង​ដល់​ពួក​គាត់​ក្នុង​ការ​ជួប​ជុំ​ក្រុម​គ្រួសារ។​ ទី​តាំង​រថយន្ដ​ក្រុង​របស់រដ្ឋដែលមិនគិតថ្លៃនេះ ស្ថិតនៅមណ្ឌល​រដ្ឋបាល​សាលា​ខេត្ដ​សៀមរាប។ រថយន្ត​ចំនួន ១២០​គ្រឿង នៃ៤៥៥គ្រឿង នឹងដឹកជញ្ជូនប្រជាពលរដ្ឋដោយមិនគិតថ្លៃ មកកាន់​ខេត្ត​សៀមរា​ប ក្នុងរយៈពេល ៥ថ្ងៃ ចាប់ពីថ្ងៃទី១២ដល់ថ្ងៃទី១៦ខែតុលាឆ្នាំ២០២៣នេះ៕