ផ្សែងពណ៌ប្រផេះដ៏ខ្មួលខ្មាញ់ពីចំហេះព្រៃរាប់សិបកន្លែង នៅក្នុងតំបន់ព្រៃអាម៉ាហ្សូន របស់​ប្រទេស​ប្រេស៊ីល ដែលភាគច្រើននៃចំហេះទាំងនោះបានចាប់ផ្តើមដោយខុសច្បាប់ បាន​ហុយ​ឡើង​ពាស​ពេញ​រដ្ឋធានី Manaus ក្នុងតំបន់ ដែលធ្វើឱ្យគុណភាពខ្យល់កាន់តែគ្រោះថ្នាក់ និង​មិន​អាច​ដក​ដង្ហើមបាន។

ប្រជាពលរដ្ឋត្អូញត្អែរពីបញ្ហាមានក្លិនឈួល និងបញ្ហាបំពង់ក ដោយសារផ្សែងពីចំហេះនោះ។ ក្រុម​អ្នក​ជំនាញ​និយាយថា ផ្សែងដ៏ខ្មួលខ្មាញ់នេះកើតចេញពីចំហេះព្រៃជុំវិញទីក្រុង និងក្នុង​តំបន់​ផ្សេង​ទៀត​ ដែលជារឿយៗបានបង្កឡើងដោយចេតនា ដើម្បីបោសសម្អាតដើមឈើសម្រាប់កសិកម្ម និង​ការ​អភិវឌ្ឍន៍ ទីក្រុងដោយគ្មានការអនុញ្ញាត។

យោងតាមសមាគមអភិរក្សសត្វព្រៃបានឱ្យដឹងថា លក្ខខណ្ឌអាកាសធាតុស្ងួតខ្លាំង បង្កឡើង​ដោយ​គ្រោះរាំ​ងស្ងួតធ្ងន់ធ្ងរ ដែលតំបន់នេះកំពុងទទួលរង ជាមួយនឹងសីតុណ្ហភាពដ៏ខ្ពស់ខ្លាំង បាន​ជួយ​ក្នុង​ការ​បញ្ឆេះភ្លើង និងការរាលដាលយ៉ាងឆាប់រហ័សនៃចំហេះផងដែរ។

តំបន់​ព្រៃអាម៉ាហ្សូននេះ កំពុងស្ថិតនៅក្រោមសម្ពាធពីបាតុភូតអាកាសធាតុអ៊ែល នីញ៉ូ ហើយ​ទឹក​ភ្លៀង​នៅ​ភាគ​ខាងជើងព្រៃអាម៉ាហ្សូន គឺទាបជាងកម្រិតមធ្យមភាគប្រវត្តិសាស្ត្រ ហើយដៃទន្លេ និង​ខ្សែទឹក ដែលរត់ចូលទៅក្នុងទន្លេអាម៉ាហ្សូន ក៏បានធ្លាក់​ចុះ​ដល់​កម្រិត​មិន​ធ្លាប់​មាន​ក្នុង​កំណត់​ត្រា​ផង​ដែរ​៕