នាយករដ្ឋមន្ត្រីថៃ លោក Srettha Thavisin បានជួបជាមួយឯកអគ្គរដ្ឋទូតអ៊ីស្រាអែល លោកស្រី Orna Sagiv នៅថ្ងៃសុក្រ ទី១៣ ខែតុលានេះ ហើយ​បាន​ជំរុញ​ឱ្យ​ជួយ​សម្រួល​ដល់​ការ​ធ្វើ​មាតុភូមិ​និវត្តន៍​ពលរដ្ឋថៃ ឲ្យត្រឡប់មកប្រទេសថៃវិញ ដោយសារតែជម្លោះអ៊ីស្រាអែល និងក្រុមហាម៉ាស។

លោក Srettha បាននិយាយថា ពលរដ្ឋថៃជិត ៦.០០០នាក់ បានចុះ​ឈ្មោះ ដើម្បី​វិល​ត្រឡប់​មក​ប្រទេស​វិញ ប៉ុន្តែលោកបាននិយាយថា ការជម្លៀសពួកគេប្រហែលជាត្រូវការពេលវេលា ខណៈ​ជន​ជាតិ​ថៃ​ត្រូវនៅរាយប៉ាយនៅកន្លែងផ្សេងៗគ្នាក្នុងតំបន់។

អ្នកជម្លៀស​ខ្លួនចំនួន៤១នាក់ ដែលទាំងអស់ជាពលករបម្រើការងារនៅប្រទេសអ៊ីស្រាអែល ត្រូវ​បាន​បញ្ជូនត្រឡប់មកប្រទេសថៃវិញកាលពីថ្ងៃព្រហស្បតិ៍ ទី១២ ខែតុលា តាម​រយៈ​ជើង​ហោះ​ហើរ​ពាណិជ្ជ​កម្ម រួមទាំងជនជាតិថៃ១៥នាក់ ដែលត្រូវបានផ្តល់អាទិភាពដោយរដ្ឋាភិបាលថៃ ដោយ​សារ​តែពួកគេរងរបួស និងរស់នៅក្នុងតំបន់មានហានិភ័យខ្ពស់។

យោង​តាមរដ្ឋាភិបាលថៃបានឱ្យដឹងថា ចំនួនអ្នកស្លាប់របស់ពលរដ្ឋថៃក្នុងប្រទេសអ៊ីស្រាអែល បាន​កើន​ឡើង​ដល់ ២១ នាក់កាលពីថ្ងៃព្រហស្បតិ៍ ដោយ ១៦ នាក់ត្រូវបានចាប់ជាចំណាប់ថ្នូរ និង ១៤ នាក់ទៀតរងរបួស។

ប្រទេស​ថៃជាប្រភពពលករចំណាកស្រុកច្រើនបំផុតមួយ ក្នុងប្រទេសអ៊ីស្រាអែល ដែលមាន​ប្រមាណ ៣០.០០០នាក់ធ្វើការក្នុងវិស័យកសិកម្ម៕