អ្នកនាំពាក្យអង្គការសហប្រជាជាតិ បាននិយាយនៅថ្ងៃសុក្រ (១៣ តុលា) នេះថា យោធា​អ៊ីស្រាអែល​បានបញ្ជាឲ្យមានការជម្លៀសពលរដ្ឋទាំងអស់ចេញពីភាគខាងជើងតំបន់ហ្គាហ្សា ដែល​ជា​តំបន់មួយមានប្រជាជនចំនួន ១,១លាននាក់ក្នុងរយៈពេល ២៤ម៉ោង។

នេះ​អាចបង្ហាញពីការវាយលុកតាមដីគោករបស់អ៊ីស្រាអែល ដែលជិតមកដល់ ទោះបី​ជា​យោធា​អ៊ីស្រាអែល​មិ​នទាន់បានបញ្ជាក់ពីការអំពាវនាវបែបនេះក៏ដោយ។ កាលពីថ្ងៃព្រហស្បតិ៍ យោធា​អ៊ីស្រាអែល​បាននិយាយថា ខណៈដែលខ្លួនកំពុងរៀបចំជំហានបន្ទាប់ ការសម្រេច​មិន​ទាន់ត្រូ​វ​បាន​ធ្វើ​ឡើង​នៅឡើយទេ។

បទបញ្ជា ដែលត្រូវបានបញ្ជូនទៅអង្គការសហប្រជាជាតិនេះ ធ្វើឡើងនៅពេល​ដែល​អ៊ីស្រាអែល​បើកការ​វាយលុកប្រឆាំងនឹងក្រុមសកម្មប្រយុទ្ធហាម៉ាស។ អ្នកនាំពាក្យ​របស់​អង្គការ​សហ​ប្រជាជាតិ លោក Stephane Dujarric បានហៅបទបញ្ជានេះថា «មិនអាចទៅរួចនោះទេ» ដោយ​គ្មាន «ការបំផ្លិចបំផ្លាញនូវផលវិបាកមនុស្សធម៌»។

ដំណើរ​ទស្សនកិច្ចរបស់រដ្ឋមន្ត្រីការបរទេសអាមេរិក លោក Antony Blinken រួមជាមួយ​នឹង​ការ​ដឹក​ជញ្ជូន​សព្វាវុធរបស់សហរដ្ឋអាមេរិក បានផ្តល់ភ្លើងខៀវដ៏មានឥទ្ធិពលដល់អ៊ីស្រាអែល ដើម្បី​ជំរុញ​ការឆ្ពោះទៅមុខជាមួយនឹងការសងសឹករបស់ខ្លួននៅក្នុងតំបន់ហ្គាហ្សា បន្ទាប់​ពី​ការ​វាយ​ប្រហារ​ដ៏​សាហាវរបស់ពួកហាម៉ាសលើជនស៊ីវិល និងទាហាន ទោះបីជាក្រុម​ផ្តល់​ជំនួយ​អន្តរជាតិ​បាន​ព្រមាន​អំពីស្ថានភាពកាន់តែអាក្រក់ទៅៗនៃវិបត្តិមនុស្សធម៌ក៏ដោយ៕