នៅថ្ងៃសុក្រ (១៣ តុលា) នេះ ប្រទេសកូរ៉េខាងជើង បានបដិសេធថា អាវុធដែលត្រូវបានប្រើប្រាស់ដោយក្រុមហាម៉ាស ក្នុងការវាយប្រហារប្រឆាំងនឹងអ៊ីស្រាអែល មិនមែនជារបស់ខ្លួននោះទេ ដោយនិយាយថា ការអះអាងដែលបានធ្វើឡើងនៅក្នុងរបាយការណ៍ប្រព័ន្ធផ្សព្វផ្សាយមួយចំនួន គឺជាកិច្ចខិតខំប្រឹងប្រែងរបស់ទីក្រុងវ៉ាស៊ីនតោន ដើម្បីបង្វែរការស្តីបន្ទោសរបស់ខ្លួនចំពោះជម្លោះមួយនេះ ទៅប្រទេសទីបីប៉ុណ្ណោះ។

សារព័ត៌មានមួយបានរាយការណ៍នៅសប្តាហ៍នេះ ដោយដកស្រង់សម្តីក្រុមអ្នកជំនាញយោធាថា ពួកសកម្មប្រយុទ្ធហាម៉ាស អាចកំពុងប្រើប្រាស់អាវុធរបស់កូរ៉េខាងជើង ហើយបាននិយាយថាវីដេអូ នៃយុទ្ធជនប៉ាឡេស្ទីន បង្ហាញពីអ្វីដែលទំនងជាគ្រាប់រ៉ុក្កែត ដែលគេសង្ស័យថាមកពីកូរ៉េខាងជើង។ 

សារព័ត៌មានមួយ ដែលគ្រប់គ្រងដោយរដ្ឋាភិបាលសហរដ្ឋអាមេរិក ក៏បានដកស្រង់សម្តីអ្នកជំនាញចារកម្មម្នាក់ថា អាវុធមួយចំនួនដែលក្រុមហាម៉ាសប្រើ ទំនងជាមានប្រភពមកពីប្រទេសកូរ៉េខាងជើង។

ទីភ្នាក់ងារសារព័ត៌មានផ្លូវការ KCNA របស់កូរ៉េខាងជើង បាននិយាយថា «អង្គភាពសារព័ត៌មានផ្ដេសផ្ដាស់មួយចំនួនរបស់រដ្ឋបាលអាមេរិក និងក្រុមអ្នកជំនាញដ៏លម្អៀង កំពុងផ្សព្វផ្សាយពាក្យចចាមអារ៉ាមគ្មានមូលដ្ឋានត្រឹមត្រូវ និងមិនពិត ដែលថា «អាវុធរបស់កូរ៉េខាងជើង» ហាក់ដូចជាត្រូវបានប្រើប្រាស់សម្រាប់ការវាយប្រហារលើអ៊ីស្រាអែល»។

សារព័ត៌មាន KCNA បាននិយាយថា ជម្លោះអ៊ីស្រាអែលបានលេចចេញជា «បន្ទុកយុទ្ធសាស្ត្រដ៏ធំ» មួយទៀតសម្រាប់ទីក្រុងវ៉ាស៊ីនតោន បន្ថែមពីលើវិបត្តិអ៊ុយក្រែន ហើយបានបង្ហាញពីដែនកំណត់នៃយុទ្ធសាស្ត្ររបស់សហរដ្ឋអាមេរិកសម្រាប់អនុត្តរភាព និងគោលដៅរបស់ខ្លួន ក្នុងការក្លាយជាមហាអំណាចសកលតែមួយគត់៕