សហភាពអឺរ៉ុប បានព្រមានក្រុមហ៊ុន TikTok អំពីបញ្ហា «ព័ត៌មានមិនពិត» ដែល​រីករាល​ដាល​នៅ​លើ​វេទិកាកម្មវិធីវីដេអូកម្សាន្តមួយនេះ បន្ទាប់​ពីការវាយប្រហាររបស់ក្រុមសកម្ម​ប្រយុទ្ធ​ប៉ាឡេស្ទីន​ហាម៉ាស លើអ៊ីស្រាអែល។

សហភាពអឺរ៉ុបបានជំរុញឱ្យនាយកប្រតិបត្តិក្រុមហ៊ុន TikTok គឺលោក Shou Zi Chew នៅក្នុង​សារ​បង្ហោះមួយ ឱ្យ «បង្កើនកិច្ចខិតខំប្រឹងប្រែងជាបន្ទាន់» និងដាក់ចេញ «ក្នុងរយៈពេល ២៤ម៉ោង​បន្ទាប់» ពីមធ្យោបាយដែល​ក្រុមហ៊ុន​នេះ​កំពុង​អនុវត្ត​ស្រប​តាម​ច្បាប់​ឌីជីថល​របស់​អឺរ៉ុប​។

ក្រុមហ៊ុនប្រព័ន្ធផ្សព្វផ្សាយសង្គមជាច្រើន បានមើលឃើញការកើនឡើង នៃព័ត៌មានមិនពិត​អំពី​ជម្លោះ​អ៊ីស្រអែល រួមទាំងរូបភាពបែបបំភ្លៃ និងវីដេអូដែលដាក់ចំណងជើងខុសជាច្រើនទៀត។ នៅ​មុននោះ សហភាពអឺរ៉ុបក៏បានព្រមានក្រុមហ៊ុន X ដែលកាលពីមុនឈ្មោះថា Twitter និង​ក្រុមហ៊ុន​ Meta អំពីមាតិកាខ្លឹមសារបែបនោះផងដែរ។ សហភាពអឺរ៉ុបបាននិយាយថា ក្រុមហ៊ុន TikTok ចាំបាច់ត្រូវយកចិត្តទុកដាក់លើប្រជាប្រិយភាពរបស់ខ្លួនជាមួយយុវវ័យ។

ច្បាប់​សេវាកម្មឌីជីថល (DSA) តម្រូវឱ្យ «វេទិកាអនឡាញធំៗ» លុប «ខ្លឹមសារខុសច្បាប់» ចេញ​ជា​សកម្ម ហើយតម្រូវឲ្យបង្ហាញថា ពួកគេបានចាត់វិធានការដើម្បីឆ្លើយតបនឹងបញ្ហាបែបនោះ ប្រសិន​បើមានការស្នើសុំ៕