យោងតាមសេចក្តីថ្លែងការណ៍នៅថ្ងៃសុក្រនេះ បានឲ្យដឹងថា ទីភ្នាក់ងារផ្តល់ជំនួយ និង​ការងារ​របស់​អង្គការសហប្រជាជាតិ (UNRWA) បានផ្លាស់ប្តូរ​ទីតាំង​មជ្ឈ​មណ្ឌល​ប្រតិបត្តិការ​កណ្តាល​របស់​ខ្លួន​ និងបុគ្គលិកអន្តរជាតិនៅតំបន់ហ្គាហ្សា ទៅកាន់ភាគ​ខាង​ត្បូង​នៃ​តំបន់​ដែល​ត្រូវ​បាន​ហ៊ុមព័ទ្ធ​។

សេចក្តីថ្លែងការណ៍និយាយថា ទីភ្នាក់ងារផ្តល់ជំនួយនិងការងាររបស់អង្គការសហប្រជាជាតិ (UNRWA) នឹងនៅតែបន្តប្រតិបត្តិការមនុស្សធម៌និងផ្តល់ការគាំទ្រដល់បុគ្គលិករបស់ខ្លួន និង​ដល់​ជន​ភៀស​ខ្លួនប៉ាឡេស្ទីន។

ទីភ្នាក់ងារ UNWRA បាននិយាយនៅក្នុងសេចក្តីថ្លែងការណ៍ដែលបានបង្ហោះនៅលើបណ្តាញ X ដែលពីមុន​ជាបណ្តាញ Twitter ថា យើងជំរុញ​ឱ្យអាជ្ញាធរ​អ៊ីស្រាអែល​ការពារ​ជន​ស៊ីវិល​ទាំង​អស់​នៅ​ក្នុង​ជម្រករបស់ទីភ្នាក់ងារផ្តល់ជំនួយ និងការងាររបស់អង្គការសហប្រជាជាតិ រួមទាំង​សាលា​រៀន​។

សាលារៀនរបស់អង្គការសហប្រជាជាតិ និងជម្រករបស់​អង្គការ​សហប្រជាជាតិ​ផ្សេង​ទៀត​ទាំង​អស់​ គឺជាទីតាំងរបស់អង្គការសហប្រជាជាតិ។ ទាំងអស់នេះត្រូវតែត្រូវបានការពារគ្រប់ពេលវេលា និង​មិនត្រូវរងការវាយប្រហារឡើយ ស្របតាមច្បាប់មនុស្សធម៌អន្តរជាតិ។ យោង​តាម​ការិយាល័យ​សម្រប​សម្រួល​កិច្ចការមនុស្សធម៌របស់អង្គការសហប្រជាជាតិ (OCHA) បានឱ្យដឹងថា ជាងពីរ​ភាគ​បី​នៃពលរដ្ឋចំនួន ៤២៣.០០០នាក់ បានភៀស​ខ្លួននៅ​ក្នុង​តំបន់​ហ្គាហ្សាកំ​ពុង​តែ​ស្នាក់​នៅ​ក្នុង​សាលា​រៀន គ្រប់គ្រងដោយទីភ្នាក់ងារផ្តល់ជំនួយ UNWRA ។ ទីភ្នាក់ងារ UNRWA បាន​និយាយ​កាល​ពីថ្ងៃព្រហស្បតិ៍ថាបុគ្គលិករបស់ខ្លួនចំនួន ១២ នាក់ត្រូវ​បាន​សម្លាប់​នៅ​ក្នុង​តំបន់​ហ្គាហ្សា ចាប់តាំងពីថ្ងៃទី ៧ ខែតុលា៕