ចំនួនអ្នកស្លាប់ បានកើនឡើងនៅក្នុងការប្រយុទ្ធគ្នារវាងអ៊ីស្រាអែល និងក្រុមហាម៉ាស កាលពីថ្ងៃសុក្រ ជាមួយនឹងមនុស្សជាង ៣.២០០នាក់ បានស្លាប់ នៅលើភាគីទាំងពីរ ខណៈដែលជម្លោះ កើនឡើងបានឈានចូលដល់ថ្ងៃទី៧របស់ខ្លួន។

អាជ្ញាធរសុខាភិបាលប៉ាឡេស្ទីន បាននិយាយកាលពីយប់ថ្ងៃសុក្រថា ប្រជាជនប៉ាឡេស្ទីនសរុបចំនួន ១. ៩៤៩នាក់ ត្រូវបានសម្លាប់ នៅក្នុងការប្រយុទ្ធគ្នា ដោយជាង ៨.៦០០នាក់ បានរងរបួស។

ចំនួនសរុបរួមមានមនុស្សស្លាប់ ១.៩០០នាក់ និងរបួសប្រហែល ៧.៦៩៦នាក់ នៅតំបន់ហ្គាហ្សាស្ទ្រីប ហើយ៤៩នាក់បានស្លាប់ និងជាង ៩៥០នាក់ទៀត បានរងរបួសនៅតំបន់វេសបែង។

ចំនួនអ្នកស្លាប់នៅខាងអ៊ីស្រាអែល បានកើនឡើងដល់ ១.៣០០នាក់ និងអ្នករបួសជាង៣.៤៨៤នាក់ នេះបើយោងតាមក្រសួងសុខាភិបាលអ៊ីស្រាអែល ដែលត្រូវបានដកស្រង់ដោយសារព័ត៌មាន The Jerusalem Post នៅថ្ងៃដដែលនោះ។