ប្រជាជនអូស្ត្រាលី បានចាប់ផ្តើមបោះឆ្នោត នៅថ្ងៃសៅរ៍ (ទី១៤ តុលា) នៅក្នុងប្រជាមតិជាប្រវត្តិសាស្ត្រ ដែលជាលើកដំបូងក្នុងរយៈពេលជិត២៥ឆ្នាំ ដើម្បីសម្រេចថាតើត្រូវទទួលស្គាល់ប្រជាជនដំបូងរបស់ខ្លួននៅក្នុងរដ្ឋធម្មនុញ្ញ ដូចដែលបានស្នើសុំដោយក្រុមមេដឹកនាំជនជាតិដើមរបស់ប្រទេសនេះ កាលពី៦ឆ្នាំ    មុន។

នៅឆ្នេរសមុទ្រ Bondi ដែលជានិមិត្តរូបរបស់ទីក្រុងស៊ីដនី អ្នកបោះឆ្នោត បានឈរតម្រង់ជួរ ដើម្បីសរសេរ «Yes » ឬ «No» នៅលើសន្លឹកឆ្នោត បន្ទាប់ពីសំណួរសួរថាតើពួកគេយល់ព្រមកែប្រែរដ្ឋធម្មនុញ្ញដែលមានអាយុ ១២២ឆ្នាំ ដើម្បីទទួលស្គាល់ជនជាតិដើមភាគតិច និងកោះ Torres Strait និងបង្កើត ស្ថាប័នជនជាតិដើមភាគតិច ហៅថា «The Voice to Parliament» ដែលអាចផ្តល់យោបល់ដល់រដ្ឋាភិបាលលើបញ្ហាជនជាតិដើមភាគតិច។

ទ្វារចូលទៅការិយាល័យបោះឆ្នោតបើកនៅម៉ោង ៨ ព្រឹក (ចាប់ពីម៉ោង ២១០០ម៉ោងសកល នៅថ្ងៃសុក្រនៅទីក្រុងស៊ីដនី និងមែលប៊ន ដល់ម៉ោង ២៤០០ ម៉ោងសកល នៅទីក្រុង Perth) ទោះបីជាមនុស្សជាង ៥លាននាក់ បានបោះឆ្នោតរួចហើយនៅមណ្ឌលបោះឆ្នោត មុនកាលកំណត់ នៅក្រៅប្រទេស ឬតាមរយៈការបោះឆ្នោតតាមប្រៃសណីយ៍ក្តី។ ការបោះឆ្នោត គឺជាកាតព្វកិច្ច នៅក្នុងប្រទេសអូស្ត្រាលី។

ការរាប់សន្លឹកឆ្នោត នឹងចាប់ផ្តើមបន្ទាប់ពីការបោះឆ្នោតបិទនៅម៉ោង៦ល្ងាច (០៧០០ ម៉ោងសកល នៅទីក្រុងស៊ីដនី) ហើយគណៈកម្មាធិការបោះឆ្នោតអូស្ត្រាលី នឹងចេញផ្សាយចំនួនសរុប ដែលបានធ្វើបច្ចុប្បន្នភាព នៅពេលទទួលបានសន្លឹកឆ្នោតមកពីមណ្ឌលបោះឆ្នោត។