បារាំង ៖  រដ្ឋមន្រ្តីក្រសួងមហាផ្ទៃបារាំងលោក Gerald Darmanin និយាយកាលពីថ្ងៃសៅរ៍ថា ការគំរាមកំហែងរបស់ក្រុមជីហាដ បានផ្លាស់ប្តូរ ចាប់តាំងពីការផ្ទុះឡើងជម្លោះរវាងក្រុមហាម៉ាស់ និងអ៊ីស្រាអែល ។ 

 លោក Darmanin បានបដិសេធន៍ពុំធ្វើសេចក្តីអធិប្បាយលើការស៊ើបអង្កេតចំពោះការវាយប្រហារដេញចាក់ដោយ ជីវពលអ៊ីស្លាមនៅទីក្រុង Arras ស្ថិតនៅភាគខាងជើងប្រទេសបារាំង ដែលបណ្តាលឲ្យគ្រូបង្រៀនម្នាក់ស្លាប់ ។ 

 បារាំងបានប្រកាសអាសន្នសន្តិសុខកម្រិតខ្ពស់បំផុតកាលពីថ្ងៃសុក្រ ក្រោយជនវាយប្រហារអាយុ ២០ឆ្នាំម្នាក់ បានសម្លាប់គ្រូបង្រៀនម្នាក់ និងបណ្តាលឲ្យមនុស្ស ២នាក់ផ្សេងទៀត រងរបួសធ្ងន់ ។ 

 លោក Darmanin និយាយថា សារមន្ទីរ Louvre វិមាន Versailles និងស្ថានីយ៍រថភ្លើង Paris' Gare de Lyon ត្រូវបានបានជម្លៀសខ្លួនមនុស្សចេញ កាលពីថ្ងៃសៅរ៍ ក្រោយការគំរាមកំហែងដោយគ្រាប់បែក ។ 

 ការប្រកាសអាសន្នសន្តិសុខចុងក្រោយនេះដែរ បានកើតមានឡើង ស្របពេលដែលប្រទេសបារាំងធ្វើជាម្ចាស់ផ្ទះព្រឹត្តការណ៍កីឡាបាល់ឱប Rugby World Cup ហើយនិងមានរយៈពេលតិចជាង ១ឆ្នាំ មុនពេលទីក្រុងប៉ារីស ស្វាគមន៍ព្រឹត្តការណ៍ Olympic Games ដែលរួមទាំងផែនការសម្រាប់ពិធីបើកសម្ពោធន៍មិនធ្លាប់ដែលមានកាលពីមុននៅក្រៅពហុកីឡដ្ឋាន ហើយនិងការដង្ហែរព្យុហយាត្រាទៅកាន់ទន្លេ Seine ។សូមបញ្ជាក់ថា បារាំងបានហាមឃាត់ការធ្វើបាតុកម្មគាំទ្រប៉ាឡេស្ទីន ហើយមនុស្ស ៩នាក់ ត្រូវបានចាប់ខ្លួនអំឡុងពេលធ្វើបាតុកម្មផ្គើននឹងបំរាមនេះ នៅទីក្រុងប៉ារីស កាលពីថ្ងៃសៅរ៍ ៕