ភ្នំពេញ ៖ លោកស្រី Pauline Tameisអ្នកសម្របសម្រួលរបស់អង្គការសហប្រជាជាតិ ប្រចាំប្រទេសកម្ពុជាបានបញ្ជាក់ថាអង្គការសហប្រជាជាតិ ប្រចាំកម្ពុជា គាំទ្ររាជរដ្ឋាភិបាលកម្ពុជា ពិសេសក្រសួងសុខាភិបាល ក្នុងការប្រយុទ្ធ នឹងជំងឺកូវីដ-១៩។

​

ការថ្លែងរបស់លោកស្រី Pauline Tameisយ៉ាងដូច្នេះ ក្នុងឱកាសដែលទទួលបានអនុញ្ញាតពីឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល ឲ្យចូលជួបសម្តែងការគួរសម និងពិភាក្សាការងារនាទីសី្តការក្រសួង រសៀលថ្ងៃទី៣ ខែមិថុនា ឆ្នាំ២០២១នេះ ដោយមានការចូលរួមលោកស្រីវេជ្ជបណ្ឌិត Li Ailanប្រធានអង្គការសុខភាពពិភពលោក ប្រចាំកម្ពុជា និងលោកស្រី Kristin Parcoប្រធានបេសកកម្ម អង្គការអន្តរជាតិទទួលបន្ទុកទេសន្តប្រវេសន៍ និងលោកជំទាវ វេជ្ជបណ្ឌិត យក់ សម្បតិ្ត រដ្ឋលេខាធិការក្រសួងសុខាភិបាល និងជាប្រធានក្រុមការងារប្រតិបត្តិការបច្ចេកទេស និងផ្គត់ផ្គង់នៃគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩។

លោកស្រី Pauline Tameisក៏បានសម្តែងនូវការកោតសរសើរ និងថ្លែងអំណរគុណ ដល់រាជរដ្ឋាភិបាលកម្ពុជា និងក្រសួងសុខាភិបាល ចំពោះការងារគ្រប់គ្រងការរាតត្បាតនៃជំងឺកូវីដ-១៩នៅប្រទេសកម្ពុជា។អង្គការសហប្រជាជាតិក៏បានប្តេជ្ញាបន្តកិច្ចសហការ និងគាំទ្ររាជរដ្ឋាភិបាលកម្ពុជា ជាពិសេសក្រសួងសុខាភិបាល ក្នុងការប្រយុទ្ធនឹងជំងឺកូវីដ-១៩ ។

ជាមួយគ្នានោះដែរ ឯកឧត្តមសាស្រ្តាចារ្យ ម៉ម ប៊ុនហេង  ក៏បានសម្តែងការកោតសរសើរដោយស្មោះចំពោះកិច្ចសហការ និងការគាំទ្ររបស់អង្គការសហប្រជាជាតិ ជាពិសេសអង្គការសុខភាពពិភពលោក និងដៃគូទាំងអស់ដែលតែងតែសហការ និងគាំទ្រយ៉ាងពេញទំហឹងដល់កិច្ចខិតខំប្រឹងប្រែងរបស់ក្រសួងសុខាភិបាលក្នុងការប្រយុទ្ធនឹងជំងឺកូវីដ-១៩៕អត្ថបទ ៖ រដ្ឋា