ប្រធានាធិបតីអេហ្ស៊ីប លោក អាប់ឌែល ហ្វាតា អែលស៊ីស៊ី (Abdel Fattah el-Sisi) បាន​ស្តី​បន្ទោស​អ៊ីស្រាអែលចំពោះការឆ្លើយតបរបស់ខ្លួនប្រឆាំងនឹងក្រុមហាម៉ាស ពេលកំពុងនិយាយជា មួយ​រដ្ឋមន្ត្រីការបរទេសអាមេរិកលោកអង់តូនី ប៊ី្លនខិន ( Antony Blinken) ដោយ​ហៅ​ការ​វាយ​លុក​លើតំបន់ហ្គាហ្សាថាជា «ការដាក់ទណ្ឌកម្មរួម»។

លោកអែ​លស៊ីស៊ី បានប្រាប់លោកប្ល៊ីនខិន កាលពីថ្ងៃ​អាទិត្យថា​ «ប្រតិកម្ម​បាន​ជ្រុល​ហួស​ពី​សិទ្ធិ​ការពារ​ខ្លួន ដោយប្រែទៅជាការដាក់ទណ្ឌកម្មរួមសម្រាប់មនុស្ស ២,៣លាន​នាក់​នៅ​តំបន់​ហ្គាហ្សា»​ នេះបើយោងតាមសារព័ត៌មានរ៉យទ័រ។ ការអធិប្បាយនេះ គឺជាសេចក្តីថ្លែង​ការណ៍​ជា​សាធារ​ណៈ​ដ៏ខ្លាំង​បំផុត​មួយ​ចំនួន​របស់​ប្រទេស​អេហ្ស៊ីប ចាប់តាំងពីការសម្លាប់រង្គាលកាលពីសប្តាហ៍មុន នៅឯពិធីបុណ្យប្រគុំតន្ត្រីអ៊ីស្រាអែល បាន​ប្រែក្លាយជម្លោះរវាងអ៊ីស្រាអែល និងប៉ាឡេស្ទីន ទៅជាសង្រ្គាមពេញទំហឹង។ ប្រទេសអេហ្ស៊ីប បាន​ក្លាយជាចំណុចកណ្តាលរវាងអ៊ីស្រាអែល និងប៉ាឡេស្ទីន ដោយសហរដ្ឋអាមេរិក និង​អ៊ីស្រាអែល កំពុងចរចាជាមួយប្រទេសនេះ ដើម្បីអនុញ្ញាតឲ្យពលរដ្ឋអាមេរិក និងជនបរទេស ចូល​ទៅ​អេហ្ស៊ីបពីតំបន់ហ្គាហ្សា។

សង្គ្រាម​កាន់តែធំ ធ្វើឲ្យមានការភ័យខ្លាចកាន់តែខ្លាំង ខណៈដែលការប្រយុទ្ធគ្នា បានផ្ទុះ​ឡើង​នៅ​ព្រំដែន​ អ៊ីស្រាអែលទីពីរ។

មេដឹកនាំ​អេហ្ស៊ីបរូបនេះ ក៏បានប្រាប់លោកប្ល៊ីនខិនថា សង្រ្គាមអាចមាន​ផល​ប៉ះពាល់​ដល់​តំបន់​ទាំងមូល​ ទោះបីជាលោក បានអះអាងថា អេហ្ស៊ីប នៅតែជាសម្ព័ន្ធមិត្តរបស់ជនជាតិជ្វីហ្វក្តី៕