អ្នកស្នងមរតកអាជីវកម្ម លោក ដានីញ៉ែល ណូបូអា (Daniel Noboa) គឺជាប្រធានាធិបតី​បន្ទាប់​របស់​ប្រទេស​អេក្វាឌ័រ ដោយបានប្រកាសជ័យជម្នះរបស់ខ្លួនកាលពីថ្ងៃអាទិត្យ (១៥ តុលា) ខណៈ​ដែល​ក្រុមប្រឹក្សាជាតិបោះឆ្នោតរបស់ប្រទេសនេះបាននិយាយថា លទ្ធផល​បោះឆ្នោត​បាន​ចង្អុល​បង្ហាញ​ពីការឈ្នះដាច់ ហើយគូប្រជែងរបស់លោក ណូបូអា ក៏បានទទួលស្គាល់​ជ័យ​ជម្នះ​នោះ​ផង​ដែរ។

លោក ណូបូអា ទទួលបានសម្លេងឆ្នោតច្រើនជាង ៥២% ខណៈដែល​គូប្រជែង​ឆ្វេង​និយម​របស់​ខ្លួន គឺលោក លូអ៊ីសា ហ្គុនហ្ស៊ាឡេស (Luisa Gonzalez) ទទួលបានសម្លេងគាំទ្រប្រហែល ៤៨%​ ជាមួយនឹងសន្លឹកឆ្នោតជាង ៩០% ត្រូវបានរាប់រួចទៅហើយ។

លោក ណូបូអា វ័យ ៣៥ឆ្នាំ ដែលជាបេក្ខជនប្រធានាធិបតីដ៏គួរឱ្យភ្ញាក់ផ្អើលម្នាក់ សម្រាប់​ការ​បោះឆ្នោត​នៅដើមអាណត្តិ បានសន្យាថា នឹងធ្វើឱ្យសេដ្ឋកិច្ចប្រសើរឡើង ព្រមទាំង​បង្កើត​ការងារ​សម្រាប់​យុវជន ក៏ដូចជាបញ្ជូនខ្លួនឧក្រិដ្ឋជនដ៏គ្រោះថ្នាក់ ដាក់នៅលើកប៉ាល់ពន្ធនាគារផងដែរ។

លោក ណូបូអា នឹងជួបប្រទះនឹងបញ្ហាប្រឈមដ៏សំខាន់នៃការកែតម្រូវសេដ្ឋកិច្ច ដែលបានជួប​ផល​លំបាក​ចាប់តាំងពីការរាតត្បាតនៃមេរោគឆ្លងកូវីដ១៩ ព្រមទាំងបានជំរុ​ញ​ឱ្យ​ប្រជាជន​អេក្វាឌ័រ​រាប់​ពា​ន់នាក់ធ្វើអន្តោប្រវេសន៍ និងមានកំណើនឧក្រិដ្ឋកម្មយ៉ាងខ្លាំង រួមទាំងការ​កើន​ឡើង​នៃ​ឃាតកម្ម ប្លន់ និងកុបកម្មក្នុងពន្ធនាគារនៃប្រទេសមួយនេះផងដែរ៕