សភាតំណាងរាស្រ្តសហរដ្ឋអាមេរិក ដែលជាប់គាំងអស់រយៈពេលពីរសប្តាហ៍កន្លងមកនេះ ក្នុង​ពេល​មាន​ជម្លោះភាពជាអ្នកដឹកនាំក្នុងចំណោមគណបក្សសាធារណរដ្ឋ នឹងបោះឆ្នោតនៅថ្ងៃអង្គារ ទី១៧ ខែ តុលា ក្នុងការប៉ុនប៉ងចុងក្រោយរបស់ខ្លួនដើម្បីជ្រើសរើសប្រធានសភា ដែល​សមាជិក​ត្រូវ​បាន​គេ​ប្រាប់កាលពីថ្ងៃអាទិត្យ។

សមាជិកមានការខកចិត្តកាន់តែខ្លាំងឡើង ខណៈអវត្តមានប្រធានសភា ដែល​បាន​រារាំង​សកម្មភាព​លើ​វិធានការចំណាយសំខាន់ៗ និងធ្វើឲ្យសភា​មិន​ឱ្យ​មាន​ប្រតិកម្ម​ចំពោះ​វិបត្តិ​ដូច​ជា​សង្រ្គា​ម​អ៊ីស្រាអែល និងក្រុមហាម៉ាស។ ខណៈប្រធានសភាបណ្តោះអាសន្ន លោក Patrick McHenry ត្រូវបានគេ តែងតាំងបន្ទាប់ពីការបណ្តេញចេញដ៏គួរឲ្យភ្ញាក់ផ្អើលលោក Kevin McCarthy កាលពីថ្ងៃទី ៣ខែតុលា ការជំនួសតំណែងលោកមានអំណាចពិតប្រាកដតិចតួច។ លោក McCarthy បានក្លាយ​ជាជន​រង​គ្រោះ​នៃ​ការ​បែងចែក​យ៉ាង​ខ្លាំង​រវាង​អ្នក​និយម​កណ្តាល​គណបក្ស​សាធារណរដ្ឋ និងមួយចំនួនតូច នៃ​អ្នកគាំទ្រ​ស្តាំនិ​យម​ជ្រុល​របស់​អតីត​ប្រធានា​ធិបតី​លោក ​Donald Trump ។

បន្ទាប់ពី១សប្តាហ៍ដ៏តានតឹងដែលត្រូវបានកត់សម្គាល់ដោយ ភាព​ខ្វែង​គំនិត​គ្នា​ជាច្រើន សមាជិកសភារដ្ឋ Ohio លោក Jim Jordan ជាអតីតគ្រូ​បង្វឹក​កីឡា​ចំបាប់​ដែល​ស្និទ្ធ​នឹង​លោក Trump បច្ចុប្បន្នគឺជាបេក្ខជនតែមួយគត់ដែលត្រូវបានប្រកាសសម្រាប់ការងារនេះ ប៉ុន្តែ​លោក​ហាក់ដូចជានៅឆ្ងាយពីការគាំទ្រដែលត្រូវការ ដើម្បីត្រូវបាន​ជ្រើស​រើស​ឱ្យ​កាន់​មុខ​តំណែង​ដ៏​មានឥទ្ធិពលនេះ។ ការបោះ​ឆ្នោត​នៅ​ថ្ងៃ​អង្គា​រ​ស្អែក​នេះ​ត្រូវ​បានកំ​ណត់នៅ​ពេល​រសៀល​។ ​លោក Jim Jordan បាននិយាយនៅលើបណ្តាញ X ដែលគេ​ស្គាល់​កាល​ពី​ពេល​មុន​ថា​បណ្តាញ​ Twitterថា វាដល់ពេលដែលត្រូវធ្វើការងារ ខណៈលោកបាន​ជំរុ​ញ​ឱ្យ​សមាជិករ​បស់​លោកបិ​ទ​ភាពខ្វែងគំនិតរបស់ពួកគេ ហើយប្រមូលការគាំទ្រជុំវិញបេក្ខភាពរបស់លោក។ ការ​វាយ​ប្រហារ​ដ៏​គួរឱ្យភ្ញាក់ផ្អើលរបស់ក្រុមហាម៉ាសលើប្រទេសអ៊ីស្រាអែល ជាសម្ព័ន្ធ​មិត្ត​ប្រវត្តិ​សាស្ត្រ​របស់​អាមេរិក​បានបន្ថែមសម្ពាធសម្រាប់ប្រធានសភាថ្មី។ សភាក៏ចាំ​បាច់​ត្រូវ​មាន​សកម្មភាព​លើ​ជំនួយ​​ សម្រាប់​អ៊ុយក្រែនផងដែរ ហើយសភាប្រឈមនឹងកាលបរិច្ឆេទផុតកំណត់នៅថ្ងៃទី ១៧ ខែវិច្ឆិកា ដើម្បីធ្វើសកម្មភាពលើថវិកា និងទប់ស្កាត់ការបិទរដ្ឋាភិបាលដែលអាចកើតមាន៕