បណ្ដាមេដឹកនាំជនជាតិដើមភាគតិចអូស្ត្រាលី បានអំពាវនាវកាលពីថ្ងៃអាទិត្យ (១៥ តុលា) សម្រាប់ភាពស្ងៀមស្ងាត់រយៈមួយសប្តាហ៍ និងការឆ្លុះបញ្ចាំងពីខ្លួនឯង បន្ទាប់ពីការធ្វើប្រជាមតិដើម្បីទទួលស្គាល់ប្រជាជនភាគតិចនៅក្នុងរដ្ឋធម្មនុញ្ញ ត្រូវបានបដិសេធយ៉ាងដាច់អហង្ការ។

ជាង ៦០% នៃប្រជាជនអូស្ត្រាលី បានបោះឆ្នោត «ប្រឆាំង» នៅក្នុងការបោះឆ្នោតប្រជាមតិដ៏សំខាន់ កាលពីថ្ងៃសៅរ៍ ដែលបានសួរថា តើត្រូវផ្លាស់ប្តូររដ្ឋធម្មនុញ្ញ ដើម្បីទទួលស្គាល់ជនជាតិដើមភាគតិច និងប្រជាជនកោះ Torres Strait ជាមួយនឹងស្ថាប័នប្រឹក្សាជនជាតិដើមភាគតិច ឲ្យមាន «សម្លេងនៅក្នុងសភា» ដែលនឹងផ្តល់ដំបូន្មានដល់សភាបញ្ហាទាក់ទងនឹងសហគមន៍ ឬយ៉ាងណា។

ការបោះឆ្នោតប្រជាមតិលើកដំបូងរបស់ប្រទេសអូស្ត្រាលី ក្នុងរយៈពេលជិតមួយភាគបួននៃសតវត្សនេះ ត្រូវការសម្លេងជាតិភាគច្រើន និងសម្លេងគាំទ្ររបស់ជនជាតិភាគតិច នៅក្នុងរដ្ឋចំនួនបួនដើម្បីអនុម័ត ប៉ុន្តែរដ្ឋទាំងប្រាំមួយរបស់អូស្រ្តាលី បានច្រានចោលសំណើនេះ។

លោកស្រី Marcia Langton ដែលជាស្ថាបត្យកររបស់យុទ្ធនាការសម្លេងជនជាតិដើមភាគតិច បាននិយាយនៅលើទូរទស្សន៍ NITV ថា «នេះបញ្ជាក់ច្បាស់ណាស់ថា ការផ្សះផ្សាគ្នាគឺបានបរាជ័យ»។

ទីភ្នាក់ងារការផ្សះផ្សាអូស្ត្រាលី ដែលជាស្ថាប័នជនជាតិដើមភាគតិច បាននិយាយថា សហគមន៍នេះត្រូវបានទុកឱ្យជួបជាមួយនឹង «អំពើអាក្រក់នៃការរើសអើងជាតិសាសន៍ និងព័ត៌មានមិនពិត» ដែលពួកគេបាននិយាយថា ជាលក្ខណៈពិសេសមួយនៃការពិភាក្សាសម្រាប់សម្លេងទៅកាន់សភានេះ៕