ក្នុងបទសម្ភាសន៍មួយ ដែលបានចេញផ្សាយកាលពីថ្ងៃអាទិត្យ (ទី១៥ ខែតុលា) ប្រធានាធិបតីអាមេរិក លោក Joe Biden បាននិយាយថា រាល់សកម្មភាពរបស់ប្រទេសអ៊ីស្រាអែល ដើម្បីកាន់កាប់តំបន់ហ្គាហ្សាស្ទ្រីបម្តងទៀតនោះ នឹងក្លាយជា «កំហុសដ៏ធំមួយ» ខណៈដែលកងទ័ពអ៊ីស្រាអែល បានរៀបចំសម្រាប់ការវាយលុកផ្លូវគោក។

អ៊ីស្រាអែល ដែលកំពុងស្វះស្វែងរកការសងសឹក ចំពោះការវាយប្រហារដោយក្រុមហាម៉ាស កាលពីថ្ងៃទី៧ ខែតុលា បានប្រកាសសង្រ្គាមលើក្រុមសកម្មប្រយុទ្ធ ដោយចាប់ផ្តើមយុទ្ធនាការទម្លាក់គ្រាប់បែកឥតឈប់ឈរ និងព្រមានប្រជាជនជាង ១លាននាក់ នៅភាគខាងជើងតំបន់ហ្គាហ្សាឲ្យផ្លាស់ទីទៅភាគខាងត្បូង មុនពេលមានប្រតិបត្តិការ។

នៅពេលត្រូវបានសួរ ដោយកម្មវិធីព័ត៌មាន 60 Minutes របស់ប្រព័ន្ធផ្សព្វផ្សាយ CBS ថា តើលោកនឹងគាំទ្រការកាន់កាប់តំបន់ហ្គាហ្សា ដោយសម្ព័ន្ធមិត្តរបស់អាមេរិកដែរ ឬទេ លោក Biden បានឆ្លើយតបថា៖ «ខ្ញុំគិតថា វាជាកំហុសដ៏ធំមួយ»។ លោកបានបន្តថា ក្រុមហាម៉ាស «មិនតំណាងឲ្យប្រជាជនប៉ាឡេស្ទីនទាំងអស់» នោះទេ ហើយលោកបានបន្ថែមថា ប៉ុន្តែការលុកលុយ និង «កម្ចាត់ពួកជ្រុលនិយម» គឺជា "តម្រូវការចាំបាច់»។

សូមរំលឹកថា ការវាយប្រហារដោយក្រុមហាម៉ាស បានឃើញថា ក្រុមសកម្មប្រយុទ្ធ បានបាញ់ ចាក់ និងដុតសម្លាប់មនុស្សជាង ១៤០០នាក់ ដែលភាគច្រើនជាជនស៊ីវិល ហើយការវាយប្រហារសងសឹករបស់អ៊ីស្រាអែល ក្នុងរយៈពេលប៉ុន្មានថ្ងៃ ចាប់តាំងពីពេលនោះមក បានបំផ្លិចបំផ្លាញតំបន់នេះ និងបានសម្លាប់មនុស្សយ៉ាងហោចណាស់ ២.៦៧០នាក់ នៅតំបន់ហ្គាហ្សា ដែលភាគច្រើនជាប្រជាជនប៉ាឡេស្ទីនសាមញ្ញ។

គួរបញ្ជាក់ដែរថា អ៊ីស្រាអែលបានកាន់កាប់តំបន់ហ្គាហ្សាលើកដំបូង ក្នុងសង្គ្រាមរយៈពេល ៦ថ្ងៃ ក្នុងឆ្នាំ១៩៦៧ ហើយតំបន់នេះទើបត្រូវបានប្រគល់ឲ្យប៉ាឡេស្ទីនវិញទាំងស្រុង ក្នុងឆ្នាំ២០០៥៕