លោកនាយករដ្ឋមន្ត្រី អាន់វ៉ា អ៊ីប្រាហ៊ីម បាននិយាយនៅថ្ងៃចន្ទនេះថា ប្រទេសម៉ាឡេស៊ី មិនយល់ស្របនឹងសម្ពាធរបស់លោកខាងលិច ដើម្បីថ្កោលទោសក្រុមសកម្មប្រយុទ្ធប៉ាឡេស្ទីនហាម៉ាសទេ ចំពេលមានកំហឹងរីករាលដាលជុំវិញការវាយប្រហារដ៏សាហាវក្នុងខែនេះ ទៅលើអ៊ីស្រាអែលភាគខាងត្បូង។

លោកអាន់វ៉ា បានថ្លែងថា បណ្តាប្រទេសលោកខាងលិច និងអឺរ៉ុប បានស្នើម្តងហើយម្តងទៀតឲ្យម៉ាឡេស៊ីថ្កោលទោសក្រុមហាម៉ាសនៅក្នុងកិច្ចប្រជុំជាច្រើន ដោយពុំបានផ្តល់ព័ត៌មានលម្អិតទេ។

លោកបានថ្លែងប្រាប់សភាថា៖«ខ្ញុំបាននិយាយថា ជាគោលនយោបាយមួយ យើងមានទំនាក់ទំនងជាមួយក្រុមហាម៉ាសពីមុន ហើយវានឹងបន្តទៅមុខទៀត»។

ដូច្នេះ យើងមិនយល់ស្របនឹងអាកប្បកិរិយាដាក់សម្ពាធរបស់ពួកគេទេ ព្រោះក្រុមហាម៉ាស ក៏បានឈ្នះនៅហ្គាហ្សាដោយសេរីតាមរយៈការបោះឆ្នោត ហើយហ្គាហ្សា បានជ្រើសរើសពួកគេឲ្យដឹកនាំដែរ»។

ប្រទេសម៉ាឡេស៊ី ដែលភាគច្រើនកាន់សាសនាឥស្លាម ធ្លាប់ជាអ្នកគាំទ្រដោយសំឡេងនៃបុព្វហេតុប៉ាឡេស្ទីន និងបានតស៊ូមតិសម្រាប់ដំណោះស្រាយរដ្ឋពីរចំពោះជម្លោះរវាងអ៊ីស្រាអែល និងប៉ាឡេស្ទីន។ ប្រទេសនេះ មិនមានទំនាក់ទំនងការទូតជាមួយអ៊ីស្រាអែលទេ។