រថយន្តជំនួយជាច្រើនគ្រឿង បានចតតម្រៀបជួរបន្តកន្ទុយគ្នា នៅក្នុងទីក្រុង Al-Arish របស់ប្រទេសអេហ្ស៊ីប នៅថ្ងៃចន្ទ (ទី១៦ ខែតុលា) ខណៈដែលរថយន្តទាំងនោះ បានរង់ចាំការអនុញ្ញាតឲ្យបើកទៅកាន់ព្រំដែន Rafah ឆ្លងកាត់ជាមួយតំបន់ហ្គាហ្សា។

ព្រំដែន Rafah ដែលស្ថិតនៅលើព្រំដែន រវាងឧបទ្វីប Sinai របស់ប្រទេសអេហ្ស៊ីប និងតំបន់ហ្គាហ្សា ដែលគ្រប់គ្រងដោយក្រុមសកម្មប្រយុទ្ធហាម៉ាស គឺជាច្រកតែមួយគត់ឆ្លងចូលទៅក្នុងដែនដី ដែលមិនត្រូវបានគ្រប់គ្រងដោយប្រទេសអ៊ីស្រាអែល។

ប្រភពសន្តិសុខ និងប្រភពអង្គការក្រៅរដ្ឋាភិបាល នៅទីក្រុង Al-Arish បាននិយាយថា រថយន្តជំនួយ នៅតែរង់ចាំនៅទីនោះ បន្ទាប់ពីមានការបើកឡើងវិញនៃច្រកព្រំដែន Rafah នៅវេលាម៉ោង ៦:00 ម៉ោងសកល។ ការធ្វើដំណើរទៅកាន់ព្រំដែន Rafah អាចចំណាយពេលជាច្រើនម៉ោង។

ប្រទេសអេហ្ស៊ីបបាននិយាយថា ច្រកឆ្លងកាត់នៅតែបើកចំហពីភាគីអេហ្ស៊ីប ក្នុងរយៈពេលប៉ុន្មានថ្ងៃថ្មីៗនេះ ប៉ុន្តែត្រូវផ្អាកដំណើរការ ដោយសារតែការទម្លាក់គ្រាប់បែករបស់អ៊ីស្រាអែលទៅលើភាគីប៉ាឡេស្ទីន។

ជំនួយដែលបានមកពីប្រទេស និងអង្គការមួយចំនួន ត្រូវបានជាប់នៅទីក្រុង Al-Arish រង់ចាំកិច្ចព្រមព្រៀងស្តីពីការផ្តល់ជំនួយ និងការជម្លៀសជនបរទេស ដែលរដ្ឋមន្ត្រីការបរទេសអាមេរិក លោក Antony Blinken បាននិយាយថា សម្រេចបានបន្ទាប់ពីដំណើរទស្សនកិច្ចទៅកាន់ទីក្រុងគែរ៕