បាល់ទាត់៖ ក្រុម​កំពុង​ឈរ​កំពូល​តារាង​បណ្ដោះអាសន្ននៃ​លី​គ​កំពូល​កម្ពុជា អង្គ​រថា​យ​ហ្គឺ​រ​បាន​បន្ថែម​ក្បាលម៉ាស៊ីន​ម្នាក់​ទៀតហើយគឺ​លោក Kota Miyagi អតីត​កីឡាករ​ក្លិប FC Ryukyu នៃ​លី​ក​ទី​២ ជប៉ុន ដែល​ត្រូវ​បាន​ប្រកាស​តែងតាំង​ជា​គ្រូ​ជំនួយ​របស់​លោក Oriol Segura កាល​ពី​ម្សិលមិញ។​

​តាម​ការ​បញ្ជាក់​របស់​ក្រុម​មាន​មូលដ្ឋាន ​នៅ​ខេត្ត​សៀមរាប​នេះ​បាន​ឲ្យ​ដឹង​ថា លោក Kota Miyagi ទើប​មាន​វ័យ ២៧​ឆ្នាំ​ប៉ុណ្ណោះ តែ​បច្ចុប្បន្ន​លោក​គឺជា​គ្រូ​បង្វឹក​កាន់​អាជ្ញាប័ណ្ណ Japan Football Association (JFA) C License។​ ​មុន​ក្លាយ​ជា​គ្រូ​ជំនួយ​របស់​ក្រុម​អង្គ​រថា​យ​ហ្គឺ​រ លោក Kota ធ្លាប់​ជា​កីឡាករ​លេង​ឲ្យ​ក្រុម​លី​គ​លំដាប់​ទី៣ ជប៉ុន FC Ryukyu ដែល​បច្ចុប្បន្ន​ស្ថិត​ក្នុង​លី​គ​លំដាប់​ទី​២ កាលពី​ឆ្នាំ​២០១៦-២០១៧។ ក្រោយមក​លោក​ក៏​ត្រូវ​បាន​តែង​តាំង​ជា​គ្រូ​បង្វឹក​ក្រុម​យុវជន U12 របស់ FC Ryukyu ក្នុង​ឆ្នាំ២០១៧ និង​បន្ត​ក្លាយ​ជា​គ្រូ​ជំនួយ​ឈុត U18 នៅ​ក្នុង​ឆ្នាំ២០១៨។ ​ប៉ុន្តែ​នៅ​ក្នុង​ឆ្នាំ២០១៨ ដដែល បុរស​ចេះ​និយាយ ៣​ភាសារួមមាន​ជប៉ុន អង់គ្លេស និង​ភាសា​ខ្មែរ​យ៉ាង​ស្ទាត់ជំនាញ​រូប​នេះ ក៏បាន​ធ្វើដំណើរ​មក​ប្រទេស​កម្ពុជាតាមរយៈ​អង្គការ JICA នឹង​បាន​ធ្វើជា​ជំនួយការ​គ្រូ​បង្វឹក​ក្រុម​ជម្រើស​ខេត្ត​ក្រចេះ ក្រុម​យុវជន U15 និង U18 រហូតដល់​ឆ្នាំ២០២១។

​តាមរយៈ​វត្តមាន​របស់​គ្រូ​បង្វឹក​វ័យក្មេង​រូប​នេះ ក្លិប​អង្គ​រថា​យ​ហ្គឺ​រ​បាន​បង្ហាញ​នូវ​សុទិដ្ឋិនិយម​ថា លោក Kota នឹង​សហការ​គ្នា​ជាមួយ​គ្រូ​បង្គោល​លោក Oriol Segura ក្នុង​ការ​ដឹកនាំ​ក្រុម​ខ្លា​ទឹកក្រូច​ឲ្យ​ទទួល​បាន​ជោគជ័យ​នៅ​ក្នុង​រដូវ​កាល ២០២១ នេះ។​ ​គួរ​បញ្ជាក់​ថា បច្ចុប្បន្ន​អង្គ​រថា​យ​ហ្គឺ​រកំពុង​ឈរ​កំពូល​តារាង​បណ្ដោះអាសន្ននៃ​លី​គ​កំពូល​កម្ពុជា បន្ទាប់ពី​ឆ្លងកាត់ ៥​ប្រកួត​ឈ្នះ ៤ និង​ស្មើ១ រក​បាន ១៣​ពិន្ទុ តាម​ពីក្រោយ​ដោយ​ក្លិប​ភ្នំពេញ​ក្រោ​នដែល​រក​បាន ១២​ពិន្ទុ និង​ឈរ​លេខ​២ បន្ទាប់ពី​ឆ្លងកាត់ ៤​ប្រកួត​ឈ្នះ​ទាំង ៤​ប្រកួតមិនទាន់​ស្គាល់​ចាញ់​ដូចគ្នា៕

​អត្ថបទ៖ លី ឈុន​ឡា