ក្រសួងការបរទេសចិន នៅថ្ងៃចន្ទ (ទី១៦ ខែតុលា) បានឲ្យដឹងថា ពលរដ្ឋចិន ៤នាក់ ត្រូវបានសម្លាប់ ដោយមានបាត់ខ្លួន ២នាក់ និងរងរបួស ៦នាក់ទៀត ក្នុងជម្លោះរវាងអ៊ីស្រាអែល និងក្រុមហាម៉ាស ហើយក្រសួងបានប្រាប់ទៀតថា នៅពេលនេះ ជើងហោះហើរពាណិជ្ជកម្ម រវាងប្រទេសចិន និងអ៊ីស្រាអែល នៅតែដំណើរការដដែល។

សូមរំលឹកថា អ៊ីស្រាអែលបានប្តេជ្ញាថា នឹងកម្ទេចក្រុមហាម៉ាស ដើម្បីជាការសងសឹក ចំពោះការវាយប្រហារដែលក្រុមសកម្មប្រយុទ្ធរបស់ក្រុមនេះបានសម្រុកចូលទីក្រុងនានារបស់អ៊ីស្រាអែល កាលពី ១សប្តាហ៍កន្លងទៅ ដោយបានសម្លាប់មនុស្សប្រហែល ១.៣០០នាក់ និងចាប់ចំណាប់ខ្មាំងជាច្រើននាក់ ក្នុងការវាយប្រហារដ៏អាក្រក់ហួសប្រមាណលើជនស៊ីវិល ក្នុងប្រវត្តិសាស្ត្រអ៊ីស្រាអែល។

ជាការឆ្លើយតប យន្តហោះចម្បាំង និងកាំភ្លើងធំរបស់អ៊ីស្រាអែល ក៏បានវាយប្រហារតំបន់ហ្គាហ្សា ដោយការទម្លាក់គ្រាប់បែកយ៉ាងសន្ធាប់មិនធ្លាប់បានឃើញដែ ដោយធ្វើតំបន់បិទខ្ទប់ ដែលជាកន្លែងរស់នៅរបស់ប្រជាជនប៉ាឡេស្ទីន ២,៣លាននាក់ ស្ថិតនៅក្រោមការឡោមព័ទ្ធទាំងស្រុង។ អាជ្ញាធរនៅតំបន់ហ្គាហ្សា បាននិយាយថា គិតត្រឹមថ្ងៃអាទិត្យ (ទី១៥ ខែតុលា) មនុស្សយ៉ាងតិច ២,៤៥០នាក់ ត្រូវបានសម្លាប់ ដោយ១ភាគ៤នៃជនរងគ្រោះជាកុមារ និងជិត ១០.០០០នាក់ បានរងរបួស៕