ក្រសួងការបរទេសចិន នៅថ្ងៃចន្ទ (ទី១៦ ខែតុលា) បានអំពាវនាវដល់សហរដ្ឋអាមេរិកឲ្យបញ្ឈប់យកការគ្រប់គ្រងការនាំចេញបន្ទះឈីប មកធ្វើជារឿងនយោបាយ បន្ទាប់ពីរបាយការណ៍លម្អិតរបស់សហរដ្ឋអាមេរិក នឹងដោះស្រាយនូវចន្លោះប្រហោង ក្នុងការទប់ស្កាត់នូវការនាំចេញលើបន្ទះឈីបបញ្ញាសិប្បនិម្មិត (AI) ទៅកាន់ប្រទេសចិន។

មន្ត្រីអាមេរិកម្នាក់ បាននិយាយថា សហរដ្ឋអាមេរិកនឹងចាត់វិធានការ ដើម្បីរារាំងក្រុមហ៊ុនផលិតបន្ទះឈីបមេរិក កុំឲ្យលក់ឧបករណ៍អេឡិចត្រូនិកទៅកាន់ប្រទេសចិន ដែលពាក់ព័ន្ធនឹងការរឹតបន្តឹងរបស់រដ្ឋាភិបាល ជាផ្នែកនៃវិធានការនាពេលខាងមុខរបស់រដ្ឋបាល លោក Joe Biden ដើម្បីទប់ស្កាត់កុំឲ្យមានការនាំចេញបន្ទះឈីប AI បន្ថែមទៀត។

អ្នកនាំពាក្យក្រសួងការបរទេសចិន លោកស្រី Mao Ning បានប្រាប់ថា៖ «សហរដ្ឋអាមេរិកគួរតែបញ្ឈប់ធ្វើនយោបាយ ធ្វើជាឧបករណ៍ និងធ្វើជាអាវុធលើបញ្ហាសេដ្ឋកិច្ច ពាណិជ្ជកម្ម និងបច្ចេកវិទ្យាជាពិសេស ហើយបញ្ឈប់ការរំខានដល់ស្ថិរភាពនៃខ្សែចង្វាក់ផលិតកម្ម និងការផ្គត់ផ្គង់ពិភពលោក»៕