វិទ្យាល័យមួយក្នុងទីក្រុង Arras ភាគខាងជើងប្រទេសបារាំង ជាកន្លែង ដែលគ្រូបង្រៀនជនជាតិបារាំងម្នាក់ត្រូវបានចាក់សម្លាប់ កាលពីថ្ងៃសុក្រចុងសប្ដាហ៍កន្លងមក ត្រូវបានជម្លៀសចេញ នៅព្រឹកថ្ងៃចន្ទ (ទី១៦ ខែតុលា) នេះ បន្ទាប់ពីមានការជូនដំណឹងអំពីការបំផ្ទុះគ្រាប់បែក។ នេះបើយោងតាមអ្នកថតរូបរបស់ទីភ្នាក់ងារសារព័ត៌មាន Reuters ដែលស្ថិតនៅទីតាំងនោះ។

រដ្ឋមន្ត្រីក្រសួងមហាផ្ទៃ លោក Gerald Darmanin បាននិយាយកាលពីចុងសប្តាហ៍ថា ការវាយប្រហារកាលពីថ្ងៃសុក្រ ដែលបានជំរុញឲ្យរដ្ឋាភិបាលដាក់ការប្រុងប្រយ័ត្នផ្នែកសន្តិសុខខ្ពស់បំផុតរបស់ខ្លួន បានកើតឡើង នៅពេលដែល «បរិយាកាសជីហាដ» បានកើនឡើងខ្លាំង បន្ទាប់ពីមានការវាយប្រហារយ៉ាងសាហាវរបស់ពួកហាម៉ាសលើប្រទេសអ៊ីស្រាអែល ដែលបានបញ្ចេញនូវវិធានការសងសឹក និងការវាយប្រហារតាមអាកាស។

ខណៈពេលដែលមិនមានការរៀនសូត្រ នាថ្ងៃច័ន្ទនេះ នៅវិទ្យាល័យ Lycee Gambetta ទ្វាររបស់សាលានេះ បានបើកដើម្បីឲ្យសិស្ស និងបុគ្គលិកចូលទៅធ្វើការគោរពវិញ្ញាណក្ខន្ធរបស់លោកគ្រូ Dominique Bernard ដែលត្រូវបានសម្លាប់ដោយបុរសវ័យ ២០ឆ្នាំ នៅក្នុងការវាយប្រហារ ដែលប្រធានាធិបតីបារាំង លោក Emmanuel Macron បានថ្កោលទោសថា ជា «អំពើភេរវកម្មអ៊ីស្លាមដ៏កំណាចឃោរឃៅ»។

បន្ទាប់ពីមានការប្រកាសអាសន្នការបំផ្ទុះគ្រាប់បែក នៅថ្ងៃចន្ទនេះ លោកគ្រូ អ្នកគ្រូ ដែលខ្លះមានស្រក់ទឹកភ្នែក ហើយកាន់ដៃគ្នា បាននាំគ្នាចាកចេញពីអគារ ដូចសិស្សានុសិស្ស ដែលបានមកដាក់កម្រងផ្កាគោរពចំពោះលោក Bernard ដែរ។ នៅពេលដែលក្រុមនគរបាលផ្នែកដោះគ្រាប់បែកទៅដល់ គ្រូបង្រៀន និងសិស្សបានប្រមូលផ្តុំគ្នានៅទីធ្លាអគារទល់មុខសាលារបស់ពួកគេ ខណៈដែលបុគ្គលិកការពារជនស៊ីវិលបានលួងលោមពួកគេ៕